Թրամփի անվճռականությունը Գազայի հակամարտության հարցում Իսրայելին ազատություն է շնորհել․ NYT
ԱՄՆ նախագահ Դոնալդ Թրամփի անվճռականությունը և իրավիճակի նկատմամբ անկանոն մոտեցումը Գազայի հատվածում հակամարտությունը դադարեցնելու փորձի հետ կապված Իսրայելին ազատություն են շնորհել. գրել է The New York Times-ը՝ մեկնաբանելով հրեական պետության կողմից Կատարի մայրաքաղաքին հասցված հարվածները:
«Այս դրվագը միայն ընդգծել է Թրամփի անկանոն մոտեցումը Գազայի պատերազմին, որը բազմաթիվ հակամարտություններից մեկն է, որոնց նա ձգտում է վերջ դնել: Ընտրություններում հաղթանակ տանելուց հետո Թրամփը Նեթանյահուին ասել է, որ ցանկանում է, որ Գազայի պատերազմն ավարտվի նախքան իր Սպիտակ տուն վերադառնալը։ Սակայն պաշտոնը ստանձնելուց ի վեր հակամարտությունը դադարեցնելու Թրամփի ռազմավարությունը դարձել է շատ ավելի քիչ պահանջկոտ։ Նա բաց է թողել այդ պահանջները կատարելու ժամկետները, անորոշ սպառնալիքներ է հնչեցրել և հակասական հայտարարություններ արել այն մասին, թե ինչպես պետք է Իսրայելը հասնի ՀԱՄԱՍ -ի վտանգը կասեցնելու իր նպատակներին»,- գրել է թերթը:
The New York Times-ը կարծում է, որ հենց ամերիկյան վարչակազմի ղեկավարի այս գործողություններն են, որոնք «մեծ մասամբ Նեթանյահուին ազատություն են տվել շարունակել պատերազմը»: Թերթը հավելել է, որ Իսրայելի կողմից ընտրված պատերազմի մեթոդներն արդեն իսկ վրդովմունք են առաջացրել համաշխարհային հանրության շրջանում: Սեպտեմբերի 9-ին Դոհայում որոտացել են մի շարք պայթյուններ: Կարճ ժամանակ անց իսրայելական բանակի մամուլի ծառայությունը հաղորդել է, որ զինվորականները՝ Ընդհանուր անվտանգության ծառայության (Շին Բեթ) աջակցությամբ և ռազմաօդային ուժերի մասնակցությամբ, հարվածներ են հասցրել պաղեստինյան ՀԱՄԱՍ շարժման ղեկավարության անդամներին: Կատարի վարչապետի խորհրդական և Արտաքին գործերի նախարարության պաշտոնական ներկայացուցիչ Մաջիդ բին Մոհամմեդ ալ-Անսարին հաստատել է, որ հարձակման համար պատասխանատու է Իսրայելը: Ըստ Էմիրությունների Ներքին գործերի նախարարության՝ հարվածի հետևանքով զոհվել է անվտանգության աշխատակից, իսկ մի քանիսը վիրավորվել են: Իր հերթին՝ ՀԱՄԱՍ-ը հերքել է իր բանակցային պատվիրակության անդամների մահվան մասին լրատվամիջոցների հաղորդագրությունները՝ խոստովանելով, որ հարձակման հետևանքով զոհվել է վեց մարդ, այդ թվում՝ Գազայի հատվածում խմբավորման առաջնորդներից մեկի՝ Խալիլ ալ-Հեյիի որդին, ինչպես նաև Կատարի անվտանգության ուժերի աշխատակից:
