Սիրիայի և Իսրայելի միջև անվտանգության հարցերով բանակցությունները կարող են անցկացվել հաջորդ շաբաթ Բաքվում․ Sky News Arabia
Սիրիայի և Իսրայելի միջև անվտանգության հարցերով հանդիպումը նախատեսված է անցկացնել հաջորդ հինգշաբթի, Ադրբեջանի մայրաքաղաք Բաքվում։ Այս մասին հայտնել է Sky News Arabia-ն։
Միևնույն ժամանակ՝ Axios-ը հայտնել է, որ Իսրայելը Սիրիային առաջարկ է ներկայացրել նոր անվտանգության համաձայնագրի վերաբերյալ։ Այն ներառում է Դամասկոսից դեպի հարավ-արևմուտք ձգվող քարտեզ, որը տարածվում է մինչև Իսրայելի հետ սահմանը։
Երկու տեղեկացված աղբյուրներ նաև հայտնել են, որ Սիրիային ներկայացված Իսրայելի առաջարկը հիմնված է 1979 թվականին Եգիպտոսի հետ կնքված խաղաղության պայմանագրի վրա: Այս համաձայնագիրը Սինայի թերակղզին բաժանել է երեք գոտիների՝ A, B և C, և սահմանել է տարբեր անվտանգության կարգավորումներ և ապառազմականացման տարբեր մակարդակներ՝ կախված Իսրայելի սահմանից դրանց հեռավորությունից: Առաջարկը նաև նախատեսում է սիրիական կողմում երկու կիլոմետրով բուֆերային գոտու ընդլայնում։
Ըստ Axios-ի՝ բուֆերային գոտուն հարակից և սիրիական կողմից Իսրայելի հետ սահմանին ամենամոտ գտնվող գոտում ռազմական ուժերի և ծանր զինամթերքի տեղակայումը թույլատրված չի լինի։ Այնուամենայնիվ, Սիրիային թույլատրվելու է պահպանել ոստիկանական և ներքին անվտանգության ուժերի ներկայությունը։
Մանրամասներին ծանոթ աղբյուրը նշել է, որ առաջարկի համաձայն՝ Դամասկոսի հարավ-արևմուտքից մինչև Իսրայելի սահմանն ամբողջ տարածքը կհամարվի սիրիական ինքնաթիռների համար թռիչքային արգելված գոտի։
Դրա դիմաց իսրայելական կողմն առաջարկել է իր զորքերի աստիճանական դուրսբերում Սիրիայի տարածքից՝ բացառությամբ ռազմավարական առումով կարևոր Հերմոն լեռան գագաթի։ Ավելին՝ առաջարկի հիմնական կետերից մեկը Սիրիայով դեպի Իրան օդային միջանցքի պահպանումն էր, «որը թույլ կտար Իսրայելին ապագայում հարվածներ հասցնել Իսլամական Հանրապետությանը»։
Աղբյուրի տվյալներով՝ Իսրայելը շաբաթներ առաջ ներկայացրել է անվտանգության համաձայնագրի առաջարկ, սակայն Սիրիան դեռ չի արձագանքել։ Դամասկոսը վերջին շաբաթներին աշխատում էր հակաառաջարկի վրա։
Նա նաև նշել է, որ Իսրայելի ռազմավարական հարցերով նախարար Ռոն Դերմերը և Սիրիայի արտգործնախարար Ասաադ ալ-Շեյբանին մտադիր են քննարկել առաջարկը չորեքշաբթի Լոնդոնում՝ ԱՄՆ դեսպան Թոմ Բարաքի հետ միասին, որը միջնորդում է երկու երկրների միջև իր տեսակի մեջ երրորդ եռակողմ հանդիպման ժամանակ։
Կայքը, մեջբերելով իսրայելական տեղեկացված աղբյուրին, հայտնել է, որ Իսրայելի վարչապետ Բենիամին Նեթանյահուն հետաքրքրություն է հայտնել Սիրիայի նախագահ Ահմադ ալ-Շարաայի հետ սեպտեմբերի վերջին ՄԱԿ-ի Գլխավոր ասամբլեայի շրջանակում հանդիպում կազմակերպելու հարցում, սակայն պաշտոնյայի խոսքով՝ այս փուլում դրա հավանականությունը փոքր է։
Աղբյուրները հավելել են, որ համեստ համաձայնության հասնելը կլինի նվաճում՝ մատնանշելով Իսրայելի կոշտ դիրքորոշումն ամիսներ տևած բանակցություններում։
Աղբյուրները բացատրել են, որ սիրիական առաջարկը նպատակ ունի դուրս բերել իսրայելական ուժերը վերջին ամիսներին գրավված տարածքներից, վերականգնել 1974 թվականի զինադադարով համաձայնեցված բուֆերային գոտու ապառազմականացված վիճակը և դադարեցնել Իսրայելի օդային հարվածներն ու ցամաքային ներխուժումները Սիրիա։
Աղբյուրները հայտնել են, որ բանակցություններում չի քննարկվել Գոլանի բարձունքների կարգավիճակը , որն Իսրայելը գրավել է 1967 թվականի պատերազմում։
