Միքայել սրբազանը դատապարտվեց 2 տարվա ազատազրկման

Հրապարակվեց Շիրակի թեմի առաջնորդ Միքայել արքեպիսկոպոս Աջապահյանի գործով դատավճիռը․ նա ազատազրկվեց 2 տարի ժամկետով։

«Մեզ համար կանխատեսելի էր այս դատավճիռը։ Միքայել սրբազանն ակնկալում էր դա, հոգեպես պատրաստ էր, ինքն ի սկզբանե տրամադրված էր, որ իր նկատմամբ քաղաքական հետապնդում է իրականացվել ու իրականացվում»,– դատավճռի հրապարակումից հետո լրագրողների հետ զրույցում ասաց փաստաբան Արա Զոհրաբյանը՝ հավելելով, որ վճիռը բողոքարկելու են։

Նախորդ նիստում Միքայել սրբազանի գործով դատախազը միջնորդեց 2 տարի 6 ամիս ժամկետով ազատազրկել Սրբազանին։

Օրեր առաջ դատարանը Միքայել սրբազանին մեղավոր էր ճանաչել՝ խափանման միջոցը թողնելով անփոփոխ։

«Բանի տեղ մի դրեք, լավ է լինելու», – ասել էր Միքայել սրբազանը՝ մեկնաբանելով դատարանի վճիռը։

«Տեսանք, թե դատավորը կոպիտ ինչ խախտումներ է թույլ տալիս, որպեսզի հասնի այս արդյունքին։ Մենք կանխատեսում էինք, որ դատարանն այնպիսի որոշում է կայացնելու, որ Միքայել սրբազանին պահեն, փակեն մինչև ընտրությունները։ Սա պարզից էլ պարզ է»,– դատական նիստից հետո ասել էր փաստաբան Արա Զոհրաբյանը։

Պաշտպանները պնդում են, որ Միքայել սրբազանի գործը քաղաքական ենթատեքստ ունի։