Ո՞վ է Սամվել Կարապետյանի «Մեր ձևով» շարժման ընտրազանգվածը, և ինչպիսի՞ ընդդիմություն կունենա ԱԺ-ն 2026-ի ընտրություններից հետո․ НГ

Երևանում տեղի է ունեցել «Մեր ձևով» շարժման համագումարը, որը գլխավորում է Սամվել Կարապետյանը: Նրա զարմիկ Նարեկ Կարապետյանը հայտնել է, որ վերջին վեց շաբաթների ընթացքում իրենց միացել է 5000 կամավոր: Նրանք հաջորդ շաբաթ նախատեսում են հանրահավաք անցկացնել իրենց առաջնորդի աջակցության համար․ գրում է «Независимая газета»-ի հոդվածագիր Իգոր Սելեզնյովը։

Հոդվածագիրը հիշեցնում է, որ Սամվել Կարապետյանը կալանքի տակ է ավելի քան 110 օր: Նրան սպառնում է մինչև հինգ տարի ազատազրկում՝ պետական հեղաշրջում հրահրելու մեղադրանքով: Մեղադրանքները բխում են օլիգարխի խոստումից՝ պաշտպանել Հայ առաքելական եկեղեցին (ՀԱԵ) Նիկոլ Փաշինյանի հարձակումներից ցանկացած միջոցով։

Ինչպես նշվում է, սա վերջին շրջանում առաջին նման դեպքը չէ: Օրինակ՝ հոկտեմբերի 3-ին արքեպիսկոպոս Միքայել Աջապահյանը դատապարտվեց երկու տարի ազատազրկման՝ պետական հեղաշրջում հրահրելու մեղադրանքով: Դատախազությունը պահանջել էր 2,6 տարվա ազատազրկում, սակայն դատարանը «մեղմ» վերաբերմունք ցուցաբերեց:

«Այս օրերին քահանային գրեթե չեն հիշում, բայց մեկ տարի առաջ նա մեկ այլ արքեպիսկոպոսի՝ «Սրբազան պայքար» շարժման հիմնադիր Բագրատ Գալստանյանի ամենամտերիմ մարդկանցից էր։ Միասին նրանք մի քանի ամիս շարունակ գլխավորել են բազմահազարանոց բողոքի երթերը Երևանում՝ Փաշինյանին անվանելով հակաքրիստոս և թուրք գործակալ։ Գալստանյանի դատավարությունը շարունակվում է. նրան սպառնում է մինչև 15 տարվա ազատազրկում», – գրում է НГ-ն։

Տնտեսագիտության բնագավառում Նոբելյան մրցանակի դափնեկիր Տարոն Աճեմօղլուն միացել է «Մեր ձևով» շարժմանը՝ որպես խորհրդատու։ Ծնված լինելով Թուրքիայում, բայց այժմ բնակվելով Միացյալ Նահանգներում՝ ազգությամբ հայ տնտեսագետն առաջարկում է կենտրոնանալ արհեստական բանականության (ԱԲ) զարգացման վրա՝ Հայաստանի բարգավաճումն ապահովելու համար։

Հատկանշական է, որ «Թավշյա հեղափոխությունից» անմիջապես հետո Փաշինյանի թիմը հրավիրել էր Աճեմօղլուին համագործակցության։ Ըստ լուրերի՝ տնտեսագետը համաձայնվել էր, բայց իր ծառայությունների համար խնդրել էր 300,000 դոլար, ինչը Երևանը համարել էր անհիմն բարձր գին։ Մեկ այլ տարբերակի համաձայն՝ Փաշինյանն Աճեմօղլուի առաջարկները համարել է անտեղի հանրապետության համար։

«Ամեն դեպքում՝ պետք է նշել, որ այս պահին «Մեր ձևով» շարժումը հիմնականում հասցեագրվում է «Հայաստան» և «Պատիվ ունեմ» դաշինքների ընտրազանգվածին՝ փաստացի իր կողմը գրավելով նրանց: Կարապետյանի կազմակերպությունը գործնականում ոչ մի աշխատանք չի տարել տարբեր հայացքներ ունեցող մարդկանց հետ, այդ թվում՝ ոչ մի գովազդային արշավ։

Երևանի բնակիչները նույնիսկ կատակում են, որ հայտարարված 5000 կամավորները Կարապետյանի բիզնես կայսրության աշխատակիցներն են: Նրանք, ովքեր չեն սիրում Քոչարյանի և Սարգսյանի թիմերին, «Մեր ձևով»-ը համարում են Փաշինյանի անբավարար այլընտրանքը, որը հույսը դնում է հանրապետության ներսում գտնվող կիսաքրեական շրջանակների և Մոսկվայի ոչ պաշտոնական աջակցության վրա։ Այնուամենայնիվ, նույնիսկ նման ռազմավարությունը կարող է օլիգարխին հասցնել մինչև 20% ձայների հաջորդ խորհրդարանական ընտրություններում, որոնք նախատեսված են 2026 թվականի հունիսի սկզբին: Եվ սա այն ենթադրությամբ, որ իշխող «Քաղաքացիական պայմանագիր» կուսակցությունը կպահպանի իր ժողովրդականությունը մինչև ընտրությունները: Մեկ այլ խնդիր է այն, որ հաջորդ օրենսդիր ժողովում կարող են չլինել այլ ընդդիմադիր կուսակցություններ», – գրում է հոդվածագիրը։