Ուզում եմ իմ գնահատանքն արտահայտել Ադրբեջանի նախագահի երեկվա քայլի առիթով․ Փաշինյանի ելույթը Թբիլիսիում՝ կետերով
Իլհամ Ալիևը երեկ հայտարարեց, որ Ադրբեջանը վերացնում է իր տարածքով դեպի Հայաստան բեռների տարանցման սահմանափակումները։ Սա չափազանց կարևոր հայտարարություն է, և ուզում եմ իմ գնահատանքն արտահայտել Ադրբեջանի նախագահի այս քայլի առիթով․ Թբիլիսիում անցկացվող «Մետաքսի ճանապարհ» 5-րդ համաժողովին հայտարարել է Նիկոլ Փաշինյանը։
Փաշինյանի ելույթի կարևոր հատվածները՝ կետերով․
- Ղազախստանից Ադրբեջանով և Վրաստանով Հայաստան է ներմուծվում հացահատիկ։ Գործարքի համար ուզում եմ գնահատանքիս խոսքերն ուղղել նաև Ղազախստանի նախագահին և Վրաստանի վարչապետին։
- Մենք պատրաստ ենք հենց այսօրվանից, առանց չափազանցության, ՀՀ-ի տարածքով ապահովել բեռնատար ավտոմեքենաների տարանցումը Թուրքիայից դեպի Ադրբեջան և Ադրբեջանից դեպի Թուրքիա։
- Հարավային Կովկասը դառնալու է ամենագրավիչ տարանցիկ ուղին՝ «Հյուսիս – Հարավ» և «Արևելք – Արևմուտք» ուղղություններով, ինչը նշանակում է, որ մեր տարածաշրջանի բոլոր երկրների ենթակառուցվածքները ծանրաբեռնված են լինելու, եթե չասենք՝ չեն հերիքելու մեծացող այդ հոսքերը սպասարկելու համար։
- Առաջիկայում ՀՀ տարածքով Ադրբեջանից դեպի Նախիջևան, ինչպես նաև Ադրբեջան-Հայաստան-Թուրքիա խողովակաշարեր, էլեկտրահաղորդման գծեր նույնպես կկառուցվեն։ Այս ամենը քննարկման մեջ է TRIPP-ի շրջանակում։ Համապատասխան քննարկումների մեջ ենք Թուրքիայի և Ադրբեջանի հետ։
