Մենք արագորեն առաջ ենք շարժվում Հայաստանի և Ադրբեջանի հետ կոնսենսուսի գործընթացի ուղղությամբ․ ՀՀ վարչապետը շատ լուրջ ռիսկերի է դիմում․ թուրք նախարար
«Զանգեզուրի միջանցքի» և Ալիջանի սահմանային անցակետի նախագծերը կվերաիմաստավորեն Թուրքիայի դերը տարածաշրջանային առևտրային ցանցում․ հայտարարել է Թուրքիայի տրանսպորտի և ենթակառուցվածքների նախարար Աբդուլքադիր Ուրալօղլուն։
Նա նշել է, որ «Զանգեզուրի միջանցքն» ուղղակիորեն կկապի Թուրքիան և Ադրբեջանը՝ ստեղծելով Ասիայից Եվրոպա նոր առևտրային ուղի։
«Այն կկրճատի հեռավորությունները, կնվազեցնի ծախսերը և կամրապնդի Թուրքիայի տարածաշրջանային առևտրային հզորությունը»,- նշել է նա։
Նախարար Ուրալօղլուն հայտարարել է, որ սկսվել են Թուրքիայի և Հայաստանի սահմանին գտնվող Ալիջանի սահմանակետի նախապատրաստական աշխատանքները։
Նա հավելել է. «Մենք ավարտել ենք մեր ծրագրերը, այդ թվում՝ կամրջի ներկայիս վիճակի գնահատումը և դրա վերանորոգումը: Մենք արագորեն առաջ ենք շարժվում Ադրբեջանի և Հայաստանի հետ կոնսենսուսի գործընթացի ուղղությամբ: Խաղաղության գործընթացի ավարտից հետո կբացվի նաև Ալիջան անցակետը»:
Ուրալօղլուն, որը հայտարարել է, որ հանդիպել է Ադրբեջանի և Հայաստանի նախարարների հետ, նշել է. «Այստեղ լուրջ կարգավորման գործընթաց է ընթանում։ Այլ կերպ ասած՝ մասնավորապես Հայաստանի վարչապետը շատ լուրջ նախաձեռնողականություն է ցուցաբերում և ռիսկերի է դիմում։ Մենք ուշադիր հետևում ենք այս գործընթացին։ Մենք որոշակի ծրագրեր ենք կազմել, այդ թվում՝ Ալիջանի սահմանային դարպասի մոտ կամրջի ներկայիս վիճակի գնահատումը և նորի կառուցումը»։
«Մենք բառացիորեն արագորեն շարժվում ենք դեպի Ադրբեջանի, Հայաստանի և Թուրքիայի միջև կոնսենսուսի հասնելը։ Երբ դա անենք, Աստծո կամքով, մենք կբացենք այդ դուռը»,- նշել է նա։ Ուրալօղլուն հավելել է, որ այս զարգացումը կբարձրացնի «Զանգեզուրի միջանցքի» արդյունավետությունը և Չինաստանից Մեծ Բրիտանիա տանող առևտրային ուղին կդարձնի ավելի արդյունավետ։
Ըստ նրա՝ Կարս-Իգդիր-Արալըք-Դիլուջու երկաթուղային գծի շինարարությունը կմիացնի «Զանգեզուրի միջանցքը» և կամրապնդի Միջին միջանցքը։ Կարս-Իգդիր-Դիլուջու գիծը կարևոր նախագծերից է, որը կձևավորի ոչ միայն Թուրքիայի, այլև՝ ամբողջ Հարավային Կովկասի և Եվրասիայի ապագան, ասել է նա։
Ուրալօղլուն հավելել է, որ «Զարգացման ճանապարհային նախագիծը», որը մեծ հետաքրքրություն է առաջացրել եվրոպական երկրների շրջանում, կապահովի անխափան ճանապարհային և երկաթուղային հասանելիություն դեպի բոլոր եվրոպական երկրներ՝ Իրաքի Բասրայի Ֆաու նավահանգստից մինչև Լոնդոն։ Նա ընդգծել է. «Այս ռազմավարական միջանցքը կկրճատի համաշխարհային առևտրային ուղիները, կբարձրացնի Թուրքիայի լոգիստիկ ուժը և կամրապնդի տարածաշրջանային տնտեսական ինտեգրացիան»։
