Եվրոպացիները մտադիր են օգնել ՀՀ իշխանություններին խորհրդարանական ընտրություններում՝ հետապնդելով իրենց շահը․ НГ

Եվրոպական հանձնաժողովի ներկայացուցիչները հայտարարել են, որ շատ բան են սովորել Մոլդովայի փորձից և այժմ մտադիր են այն կիրառել նաև Հայաստանում: Մասնավորապես, Բրյուսելը ցանկանում է նվազեցնել Երևանի էներգետիկ կախվածությունը Մոսկվայից և «անվտանգ դարձնել» նրա տեղեկատվական տարածքը: Սակայն, մինչ Մոլդովան այս գործընթացն անցել է իր եվրոպական ինտեգրման ծրագրի շրջանակում, Հայաստանին առաջարկվում է միայն ռազմավարական գործընկերություն․ գրում է «Независимая газета»-ն։

Ինչպես նշվում է, դեկտեմբերի 2-ին Հայաստանի և Եվրամիության իշխանությունները ստորագրել են ռազմավարական գործընկերության նոր օրակարգի վերաբերյալ համաձայնագիր: 

Այն հիմնված է երեք հիմնական սկզբունքների վրա՝ պաշտպանության և անվտանգության ոլորտում համագործակցության ամրապնդում, տնտեսական համագործակցության ընդլայնում և վիզային ռեժիմի ազատականացում: Եվրամիության արտաքին գործերի նախարար Կայա Կալլասն ընդգծել է, որ Բրյուսելն այդպիսով որոշել է աջակցել Հայաստանում իրականացվող բարեփոխումներին:

Ստորագրված փաստաթուղթը չի համարվի վավերացման կարիք ունեցող նոր միջազգային պայմանագիր: Փոխարենը, կողմերն այն ընկալում են որպես իրենց քաղաքական պարտավորությունների հաստատում:

Եվրոպացիները մտադիր են նաև օգնել Հայաստանի իշխանություններին պատրաստվել խորհրդարանական ընտրություններին: ԵՄ ընդլայնման հարցերով հանձնակատար Մարթա Կոսի խոսքով՝ Բրյուսելը մտադիր է այս հարցում գործել Մոլդովայի մոդելով:

Ավելին, ԵՄ-ն ցանկանում է օգնել Հայաստանին սկսել էլեկտրաէներգիա ստանալ Թուրքիայից՝ Երևանի կախվածությունը Մոսկվայից նվազեցնելու համար: Սակայն հայտնի չէ, թե երբ թուրքական էլեկտրաէներգիան կհասնի Հայաստան:  Այնուամենայնիվ, Կոսն ընդգծել է ԵՄ հետաքրքրությունն, այսպես կոչված, «Թրամփի ուղու» նկատմամբ՝ 42 կիլոմետրանոց մայրուղու, որն անցնում է Հայաստանի Սյունիքի մարզով և նախատեսված է Բաքուն Նախիջևանի էքսկլավի հետ կապելու համար։

Ինչպես գրում է կայքը, մինչ օրս Հայաստանի կառավարության եվրոպական ձգտումները համարվում էին ոչ այլ ինչ, քան Փաշինյանի խորհրդարանական ընտրությունների նախապատրաստություն։ Սակայն ԵՄ-ն այս հարցում ունի իր սեփական ծրագրերը։ Փաշինյանին իշխանությունը պահպանելու համար անհրաժեշտ է Արևմուտքի աջակցությունը, մինչդեռ ԵՄ-ն և ԱՄՆ-ն ցանկանում են առևտուր անել Արևելքի հետ՝ շրջանցելով Ռուսաստանը և Իրանը։