Սյունիքի բնակիչներն ապրում են պատերազմի և խաղաղության միջև, իսկ «Թրամփի երթուղին» մտավախություն է առաջացնում․ Eurasianet

Սյունիքի մարզը Հայաստանի և նրա վաղեմի հակառակորդ Ադրբեջանի միջև հաշտեցման ջանքերի կիզակետն է։ ԱՄՆ նախագահ Դոնալդ Թրամփի անունով կոչված առևտրային միջանցքը, որն օգոստոսին Վաշինգտոնում ստորագրված ժամանակավոր խաղաղության համաձայնագրի առանցքային մասն էր, շուտով կանցնի մարզով․ գրել է Eurasianet-ը։

Ինչպես նշվել է, տասնամյակներ շարունակ Սյունիքի մարզն անհանգիստ է եղել հակամարտության պատճառով։ Հայ-ադրբեջանական սահմանին մոտ գտնվող Ներքին Հանդ գյուղի փորձը ցույց է տալիս խաղաղության բացակայության պատճառած վնասը։

Ներքին Հանդում մնացել է ընդամենը մոտ 20 ընտանիք։ Գյուղի շրջակա բլուրներից տեսանելի են ադրբեջանական ռազմական դիրքերը, որոնք երեք կողմից շրջփակում են գյուղը։ Ջրի պաշարները սահմանափակ են։ Պարբերաբար լսվում են կրակոցներ, հիմնականում՝ գիշերը։ Գյուղատնտեսական հողերը, որոնք մի ժամանակ կերակրում էին ընտանիքներին, այժմ չեն օգտագործվում կամ կորած են Ադրբեջանի հետ նոր սահմանի պատճառով։ Բնակիչները պետք է զգույշ լինեն մոտակա անտառներում առկա ականներից։ Մինչ բնակիչներն ապրում են պատերազմի և խաղաղության միջև, նախատեսված «Թրամփի երթուղին» (TRIPP) որոշ հայերի մոտ մտավախություն է առաջացրել։ TRIPP-ի վերաբերյալ հիմնական մանրամասները դեռևս վերջնականապես չեն հաստատվել, և շատերը մտահոգված են, որ միջանցքը կարող է խոչընդոտել Հայաստանի և Իրանի միջև հյուսիս-հարավ առևտուրը, որը տեղացիների կողմից համարվում է կարևոր տարածաշրջանի տնտեսության համար։