Միքայել սրբազանին այսօր հիվանդանոց չեն տեղափոխի․ փաստաբան

Շիրակի թեմի առաջնորդ Միքայել արքեպիսկոպոս Աջապահյանին հիվանդանոց տեղափոխելու օրը փոխվել է․ նրան վաղը՝ դեկտեմբերի 16-ին, կտեղափոխեն «Իզմիրլյան» ԲԿ։ Օրը փոխվել է՝ այսօրվա դատական նիստով պայմանավորված. ABC Media-ի հետ զրույցում ասաց փաստաբան Մարինե Ֆարմանյանը։

«Այսօրվա դատական նիստում քննարկվելու է ինչպես մեր, այնպես էլ դատախազության բողոքը։ Մենք դատավճռի դեմ արդարացման հիմքով վերաքննիչ բողոք ենք ներկայացրել, իսկ դատախազությունը բողոք է ներկայացրել, որպեսզի պատիժը խստացվի, այդ երկու բողոքները քննվելու են վերաքննիչ դատարանի դատական նիստում»,- ասաց Ֆարմանյանը։

Դատախազությունը բողոքարկել է, որպեսզի դատարանն իրենց միջնորդած 2 տարի 6 ամիսը կիրառի որպես պատիժ։

Հիշեցնենք՝ Միքայել արքեպիսկոպոս Աջապահյանը դատապարտվել է 2 տարի ժամկետով։ Նա ձերբակալվել է հունիսի 28-ին, 5 ամիս 17 օր է՝ բանտում է։