Իսրայելը պետք է վերաիմաստավորի իր կապերը Հայաստանի հետ․ The Jerusalem Post
Տասնամյակներ շարունակ Իսրայելն ու Հայաստանը պահպանել են քաղաքավարի, բայց զգույշ դիվանագիտական հեռավորություն՝ երկու փոքր ժողովրդավարություններ, որոնք բաժանված են ռազմավարական հաշվարկներով, մրցակցող տարածաշրջանային դաշինքներով․ գրում է The Jerusalem Post-ը։
Այժմ, սակայն, տարածաշրջանային իրականության փոփոխությունը հնարավորություն է տալիս ավելի խոր, ավելի իմաստալից հարաբերությունների։
Ըստ հոդվածի՝ կարևոր է, որ այս ամենը չի պահանջում, որ Իսրայելը նվազեցնի իր գործընկերությունն Ադրբեջանի հետ:
«Ռազմավարական դիվերսիֆիկացիան ռազմավարական դավաճանություն չէ: Իր վրա վստահ տարածաշրջանային դերակատարը պետք է կարողանա հավասարակշռել բազմաթիվ հարաբերությունները՝ առանց շահույթ-կորուստ հասկացության գերին դառնալու»,- գրում է կայքը։
The Jerusalem Post-ը համարում է, որ պետք է ինստիտուցիոնալացվի Իսրայել-Հայաստան ռազմավարական երկխոսությունը՝ զգայուն հարցերը, այդ թվում՝ պաշտպանական արտադրանքի արտահանումը, տարածաշրջանային ազդանշանային համակարգերը և ճգնաժամային հաղորդակցությունը: Բարեկամ երկրները, ինչպիսին են Հնդկաստանը, Հունաստանը, Կիպրոսը, ինչպես նաև ԱՄՆ-ն, նույնպես կարող են ընդգրկվել բազմակողմ ֆորումներում կամ բանակցություններում՝ որպես դիտորդներ կամ գործընկերներ։
Քանի որ Հարավային Կովկասը խոր վերափոխման է ենթարկվում, իսկ Մերձավոր Արևելքը մտնում է նոր դիվանագիտական դարաշրջան, Իսրայելն ունի հազվագյուտ հնարավորություն քնած կապերը վերածելու կայուն ռազմավարական կապիտալի։
