Զելենսկին հրապարակել է Ուկրաինայի խաղաղության ծրագրի բոլոր 20 կետերը
Հրապարակվել են Ուկրաինայում խաղաղության հաստատման ծրագրի 20 կետերը։ Ուկրաինայի նախագահ Վլադիմիր Զելենսկին դրանք հայտարարել է լրագրողների հետ հանդիպման ժամանակ․ գրում է obozrevatel.com-ը։
Նա ընդգծել է, որ սա պատերազմը դադարեցնելու հիմնական փաստաթուղթն է։ Նա հայտարարել է, որ այժմ սպասում են Ռուսաստանի արձագանքին։
Զելինսկին նաև նշել է, որ Ուկրաինան պատրաստ է հանդիպել Միացյալ Նահանգների հետ ղեկավարության մակարդակով՝ զգայուն հարցերը լուծելու համար։ Սա հատկապես վերաբերում է տարածքային հարցերին։
Խաղաղության ծրագիրը հետևյալ տեսքն ունի.
- Ուկրաինայի ինքնիշխանությունը կվերահաստատվի։ «Մենք հաստատում ենք, որ Ուկրաինան ինքնիշխան պետություն է, և համաձայնագրի բոլոր ստորագրողները դա հաստատում են»։
- Այս փաստաթուղթը ներկայացնում է Ռուսաստանի և Ուկրաինայի միջև ամբողջական և անվերապահ չհարձակման համաձայնագիր։ Նշվում է, որ երկարաժամկետ խաղաղությունը պահպանելու համար կստեղծվի մոնիթորինգի մեխանիզմ։
- Ուկրաինան կստանա «հզոր» անվտանգային երաշխիքներ։
- Խաղաղ ժամանակ Ուկրաինայի զինված ուժերի թիվը կմնա 800,000-ի մակարդակին։
- Միացյալ Նահանգները, ՆԱՏՕ-ն և եվրոպական ստորագրող պետություններն Ուկրաինային կտրամադրեն անվտանգային երաշխիքներ։
- Ռուսաստանը կամրագրի իր չհարձակման քաղաքականությունը Եվրոպայի և Ուկրաինայի նկատմամբ բոլոր անհրաժեշտ օրենքներում և բոլոր անհրաժեշտ վավերացման փաստաթղթերում։
- Ուկրաինան կդառնա Եվրամիության անդամ, և Ուկրաինան նաև կստանա կարճաժամկետ արտոնյալ մուտք դեպի եվրոպական շուկա։
- Այս կետը ներկայացնում է Ուկրաինայի համար գլոբալ զարգացման ամուր փաթեթ, որը կսահմանվի ներդրումների և ապագա բարգավաճման վերաբերյալ առանձին համաձայնագրով, որը կներառի տնտեսական ոլորտների լայն շրջանակ։
- Այս կետը վերաբերում է Ուկրաինայի վերականգնման համար միջոցների ստեղծմանը։ Ուկրաինան ներկայում նպատակ ունի ներգրավելու 800 միլիարդ դոլար՝ կապիտալի, դրամաշնորհների, պարտքի և մասնավոր հատվածի ներդրումների միջոցով՝ Ուկրաինային օգնելու իրացնել իր ամբողջ ներուժը։
- Այս համաձայնագրի կնքումից հետո Ուկրաինան կարագացնի Միացյալ Նահանգների հետ ազատ առևտրի համաձայնագրի կնքման գործընթացը։
- Ուկրաինան հաստատում է, որ կմնա ոչ միջուկային պետություն՝ համաձայն «Միջուկային զենքի չտարածման մասին» պայմանագրի։
- Զապորոժյեի ատոմակայանը համատեղ կշահագործվի 3 երկրների՝ Ուկրաինայի, Միացյալ Նահանգների և Ռուսաստանի կողմից։
- Երկու երկրներն էլ պարտավորվում են իրականացնել կրթական ծրագրեր դպրոցներում և հասարակության շրջանում, որոնք կնպաստեն տարբեր մշակույթների ըմբռնմանը և հանդուրժողականությանը, կվերացնեն ռասիզմն ու նախապաշարմունքները: Ուկրաինան կկիրառի ԵՄ կանոնները կրոնական հանդուրժողականության և փոքրամասնությունների լեզուների պաշտպանության վերաբերյալ:
- Այս կետը վերաբերում է տարածքային հարցին: Դրա համաձայն՝ Դոնեցկի, Լուգանսկի, Զապորոժյեի և Խերսոնի մարզերում զորքի տեղակայման գիծն այս համաձայնագրի կնքման օրվանից հանդիսանում է փաստացի ճանաչված շփման գիծ:
- Ապագա տարածքային պայմանավորվածությունների վերաբերյալ համաձայնեցումից հետո և՛ Ռուսաստանի Դաշնությունը, և՛ Ուկրաինան պարտավորվում են չփոխել այդ պայմանավորվածություններն ուժով:
- Ռուսաստանը չի խոչընդոտի Ուկրաինայի կողմից Դնեպր գետի և Սև ծովի օգտագործումն առևտրային գործունեության համար: Կկնքվի առանձին ծովային համաձայնագիր և մուտքի համաձայնագիր, որոնք կներառեն նավարկության և տրանսպորտի ազատությունը:
- Կստեղծվի մարդասիրական կոմիտե՝ չլուծված հարցերը լուծելու համար:
- Ուկրաինան պետք է հնարավորինս շուտ ընտրություններ անցկացնի համաձայնագրի ստորագրումից հետո։ Զելենսկու խոսքով՝ սա վերաբերում է հատկապես Ուկրաինայի նախագահական ընտրություններին։
- Այս համաձայնագիրը կլինի իրավաբանորեն պարտադիր։ Դրա իրականացումը կհսկվի և կերաշխավորվի նախագահ Թրամփի նախագահությամբ գործող Խաղաղության խորհրդի կողմից։ Ուկրաինան, Եվրոպան, ՆԱՏՕ-ն, Ռուսաստանը և Միացյալ Նահանգները կլինեն այս մեխանիզմի մաս։ Խախտումների համար կսահմանվեն պատժամիջոցներ։
- Այս համաձայնագրին բոլոր կողմերի համաձայնությունից հետո, անմիջապես ուժի մեջ կմտնի ամբողջական հրադադարի ռեժիմը։
Զելենսկին նաև ասել է, որ խաղաղության ծրագրից բացի, քննարկվում է ևս 3 փաստաթուղթ՝ Ուկրաինայի, ԱՄՆ-ի և Եվրոպայի միջև անվտանգային երաշխիքների վերաբերյալ եռակողմ փաստաթուղթ, Ուկրաինայի և ԱՄՆ-ի միջև անվտանգային երաշխիքների վերաբերյալ երկկողմ փաստաթուղթ, և մինչև 2040 թվականն Ուկրաինայի վերականգնման և տնտեսական զարգացման ճանապարհային քարտեզը։
