Ի՞նչ վիճակ է Հալեպում․ ABC Media-ին մանրամասներ են հայտնի
Երեկ կեսօրից հետո Հալեպում սկսված ուժգին բախումները շարունակվել են ողջ գիշեր։ Քաղաքն ամայացել է, զինվորական գոտու տեսք է ստացել։ Ծանր հրետանուց մինչև տարբեր տեսակի զենքեր են կիրառվում։ Մեծ թվով զոհեր և վիրավորներ կան, բայց հայ համայնքը կորուստներ չունի․ նշում են ABC Media-ի հալեպահայ աղբյուրները։
«Վիճակը չի հանդարտվում, անդադար կրակոցների ձայներ են հնչում։ Քաղաքացիները տնից դուրս չեն գալիս, դպրոցները, պետական հաստատությունները փակ են։ Փակել են նաև օդակայանը»,- պատմել է մեր զրուցակիցը։
Մեզ հետ զրույցում հայ համայնքի ներկայացուցիչներից մեկը նշել է, որ հայկական եկեղեցում Սուրբծննդյան պատարագը հասցրել են անել, հաջող է անցել նաև ազգային առաջնորդարանում փոխադարձ շնորհավորական այցերը։
Բախումներն ավելի մոտ են Նոր գյուղ հայաշատ թաղամասին, մարդիկ վախի մթնոլորտում են ապրում, վնասվել են շենքեր։ Խիստ լարված մթնոլորտը Հալեպում շարունակվում է։
