TRIPP-ն ազդարարում է ԱՄՆ-ի երկարաժամկետ դերակատարությունը Հարավային Կովկասում և աննկատելիորեն փոխում տարածաշրջանային հավասարակշռությունը․ Kyiv Post
Սպիտակ տունը կարող էր անցյալ ամռանը ձեռքսեղմումներ կազմակերպել, բայց ժպիտների ետևում Վաշինգտոնն աննկատ մշակում էր Հարավային Կովկասի մի ծրագիր, որը դիվանագիտությունը վերածում է պողպատի, ճանապարհների և իրական լծակների՝ տարածաշրջանը վերաձևավորելու համար․ գրել է Kyiv Post-ը։
Վաշինգտոնի համար TRIPP-ն ընդլայնում է առևտրային ուղիները և մատակարարման շղթաները։ Երևանի համար այն առաջարկում է ներդրումներ, աշխատատեղեր և լծակներ։ Իսկ տարածաշրջանի համար այն վերաիմաստավորում է կապը՝ որպես խաղաղության մեխանիզմ, այլ ոչ թե՝ զրոյական գումարի զիջում։
Ադրբեջանում ԱՄՆ նախկին դեսպան Ռիչարդ Կոզլարիչը շրջանակն անվանում է «լավ լուր՝ Հարավային Կովկասում խաղաղությամբ մտահոգված բոլորի համար», հենց այն պատճառով, որ այն անցնում է ձգտումից դեպի իրականացում։
Kyiv Post-ի հետ զրույցում նա նշել է, որ չնայած TRIPP-ի վերաբերյալ ՀՀ ԱԳ նախարար Արարատ Միրզոյանի և պետքարտուղար Մարկո Ռուբիոյի ստորագրած համաձայնագիրը պաշտոնապես երկկողմանի է Վաշինգտոնի և Երևանի միջև, այն անպայմանորեն ստեղծում է տրանսպորտային կապ Նախիջևանի և Ադրբեջանի մնացած մասի միջև, ինչը ենթադրում է Բաքվի հետ կուլիսային համագործակցություն։
Նույնքան զարմանալի է, թե ով չի հիշատակվում փաստաթղթում։
«Ո՛չ Ռուսաստանը, ո՛չ Իրանը չեն հիշատակվում», – նշել է նա՝ նկատելի բացթողում՝ հաշվի առնելով Թեհրանի անկայունությունը և ԱՄՆ-Ռուսաստան լարվածության սրումը։
Կոզլարիչի կարծիքով, TRIPP-ն ազդարարում է ԱՄՆ-ի երկարաժամկետ դերակատարությունը տեղում և աննկատելիորեն փոխում է տարածաշրջանային հավասարակշռությունը։
Այդ փոփոխությունը տեղի է ունենում Հայաստանի համար զգայուն պահին: Խորհրդարանական ընտրությունները մոտենում են, և Ռուսաստանը քիչ տատանումներ է ցուցաբերել քաղաքական միջամտություն օգտագործելու հարցում՝ հետխորհրդային տարածքում իր ազդեցությունը պաշտպանելու համար։ Կայքի հետ զրուցած փորձագետների կարծիքով՝ Մոսկվան կփորձի խաթարել TRIPP-ը՝ հնարավոր է՝ ազդելով Հայաստանի քվեարկության վրա։
ԱՄՆ-ի ավելի խորը ներգրավվածությունը կարող է ամրապնդել վարչապետ Նիկոլ Փաշինյանի դիրքերը։
Ինչպես նշվել է, TRIPP-ը պայմանագիր չէ և որևէ պարտադիր իրավական պարտավորություն չի սահմանում։ Սակայն Հարավային Կովկասում այն ավելի հազվադեպ հանդիպող բան է. այն խաղաղությունը կապում է շահույթի հետ և ԱՄՆ-ին ուղղակիորեն ներգրավում տարածաշրջանի տնտեսական ապագայի մեջ։
Աշխարհի այն մասում, որտեղ ազդեցությունը սովորաբար իրականացվում է զորքերի, խողովակաշարերի կամ վերջնագրերի միջոցով, Թրամփի վարչակազմը խաղադրույք է կատարում բոլորովին այլ բանի վրա՝ պողպատե ռելսեր, մաքսային ծրագրեր և առևտրային երթուղի, որը աննկատ վերաձևավորում է քարտեզը։
