Մենք կանգնած ենք Հայաստանի և հայ ժողովրդի կողքին․ Մայա Սանդուն՝ ԵԽԽՎ-ում
Մենք կանգնած ենք Հայաստանի և հայ ժողովրդի կողքին, որն աշխատում է հաղթահարել ճնշումները և պաշտպանել իր ժողովրդավարական ապագան․ այս մասին այսօր Եվրոպայի խորհրդի խորհրդարանական վեհաժողովի ձմեռային նստաշրջանի նիստում հայտարարել է Մոլդովայի նախագահ Մայա Սանդուն։
Նա նշել է, որ Մոլդովան միակ երկիրը չէ, որ բախվում է ՌԴ-ից եկող մարտահրավերների։ Հայաստանը, ըստ նրա, ևս դառնում է այդ նույն ռազմավարության թիրախ՝ «ինքնիշխանության թուլացում, ժողովրդավարական ընտրության վրա ազդեցություն, ներքին խոցելիության շահագործում»։
Մայա Սանդուն բերել է նաև Վրաստանի օրինակը․ «Ցավոք, տեսնում ենք, որ Վրաստանում, հակառակ վրաց ժողովրդի քաջությանը, որը շարունակում է պաշտպանել ժողովրդավարական արժեքները, եվրոպական ձգտումները և սեփական ապագան որոշելու իրավունքը, Ռուսաստանը կարողացավ Վրաստանին վերադարձնել իր ուղեծիր՝ օգտագործելով պատերազմի վախը և ազդանշան տալով, որ սխալ ընտրությունն արժենալու է պատերազմ»։
