Ֆրանսիայի Ազգային ժողովը միաձայն ընդունել է բանաձև, որը պահանջում է անհապաղ ազատ արձակել հայ ռազմագերիներին
Ֆրանսիայի Ազգային ժողովը միաձայն ընդունել է բանաձև, որով պահանջվում է անհապաղ և անվերապահորեն ազատ արձակել Ադրբեջանի կողմից ձերբակալված Արցախի Հանրապետության քաղաքական առաջնորդներին և կոչ է արվում Ֆրանսիայի կառավարությանը ճնշում գործադրել ադրբեջանական գերության մեջ գտնվող բոլոր հայ ռազմագերիներին ազատ արձակելու համար։
Այն ընդունվել է 183 կողմ և ոչ մի դեմ ձայնով։
Ֆրանսիացի օրենսդիրները շեշտել են, որ հայ գերիների շարունակվող դատավարություններն Ադրբեջանի՝ «Հայաստանի գոյությունը ժխտելու համակարգված քաղաքականություն վարելու» ցանկության մի մասն են։
Բանաձևը նկարագրում է այս գործընթացը որպես Լեռնային Ղարաբաղի Հանրապետության և Ադրբեջանի վերահսկողության տակ գտնվող այլ տարածքների հայ բնակչության, ինչպես նաև հայկական պատմամշակութային և կրոնական ժառանգության համակարգված ոչնչացմանն ուղղված քաղաքականության շարունակություն։
Բանաձևը զգուշացնում է, որ հայ գերիների շարունակական կալանքն ու դատավարությունները երկարաժամկետ հեռանկարում կարող են խաթարել 2025 թվականի օգոստոսի 8-ին Վաշինգտոնում ստորագրված համատեղ հռչակագրի իրականացումը: Բանաձևը վերահաստատում է իր աջակցությունն Արցախի հայ բնակչությանը, որոնք բռնի կերպով վտարվել են իրենց նախնիների հողերից։
Բանաձևը նաև դատապարտում է Արցախի Հանրապետության քաղաքական առաջնորդների կամայական բանտարկությունն ու դատավարությունը և կոչ է անում նրանց անհապաղ և անվերապահ ազատ արձակել։
Այն նաև կոչ է անում Ֆրանսիայի կառավարությանը պահանջել, որ Ադրբեջանն անհապաղ ազատ արձակի Բաքվում կալանքի տակ գտնվող բոլոր հայ ռազմագերիներին։
