Հայաստանում հույս ունեն, որ Վենսի այցը կարող է նպաստել Ադրբեջանում հայ գերիների ազատ արձակմանը․ Независимая Газета
ԱՄՆ փոխնախագահ Վենսը և տնտեսական հարցերով պետքարտուղարի տեղակալ Ջեյքոբ Հելբերգը փետրվարի 9-ից 11-ը կայցելեն Հայաստան և Ադրբեջան։ Վաշինգտոնի տվյալներով՝ այս այցը կնպաստի նախագահ Դոնալդ Թրամփի խաղաղության ջանքերին և «Trump Route for International Peace and Prosperity» (TRIPP) նախագծին։ Այնուամենայնիվ, հայկական սփյուռքը հույս ունի ընդլայնել օրակարգը և ապահովել ամերիկյան օգնությունը Լեռնային Ղարաբաղի նախկին առաջնորդներին ազատ արձակելու հարցում․ գրել է Независимая Газета-ն։
Ինչպես նշվել է, Երևանում շատերը կարծում են, որ դեռ վաղ է խոսել հակամարտության ավարտի մասին։ Մասնավորապես, քաղաքացիական հասարակության ներկայացուցիչները հույս ունեն, որ ամերիկացիները կօգնեն համոզել Բաքվին ազատ արձակել Արցախի առաջնորդներին։
Կայքը հիշեցրել է, որ Հարավային Կովկաս Վենսի այցի նախօրեին ադրբեջանական դատարանը դատապարտել է Լեռնային Ղարաբաղի գրեթե բոլոր առաջնորդներին։
Հարավային Կովկասի ուսումնասիրությունների կենտրոնի ղեկավար Ֆարհադ Մամեդովը կայքի հետ զրույցում նշել է, որ Բաքուն նման ակտիվություն սպասում էր հայ հանրությունից։
«Ամերիկյան բարձրաստիճան պատվիրակության այցը Երևան անխուսափելիորեն կհանգեցներ նման ակտիվության հայկական սփյուռքի շրջանում… Այնուամենայնիվ, կարելի է վստահորեն ասել, որ այս մարդկանց ազատ արձակումն ապահովելու ցանկացած փորձ որևէ արդյունք չի տա ո՛չ հիմա, ո՛չ էլ մոտ ապագայում», – ընդգծել է Մամեդովը։
