«Թրամփի երթուղու» իրականացումը կախված է խաղաղության պայմանագրի վավերացումից և ՀՀ-ում քաղաքական իրավիճակից.Lenta.ru
ԱՄՆ փոխնախագահ Ջեյ Դի Վենսի այցը Հարավային Կովկաս նշանավորում էր աջակցություն Երևանի և Բաքվի ներկայիս կուրսին․ Lenta.ru-ի հետ զրույցում նշել է քաղաքագետ Նիկոլայ Սիլաևը։
Նրա խոսքով՝ պաշտոնական հայտարարություններից այն կողմ գործնական արդյունքներ չպետք է ակնկալել։ Հարաբերությունների երկարաժամկետ դինամիկան որոշվում է ոչ թե անհատական այցելություններով, այլ համակարգված աշխատանքով։ Քաղաքագետը նաև ընդգծել է, որ ատոմային էներգիայի ոլորտում Միացյալ Նահանգները չունի Հայաստանում ատոմակայան կառուցելու կարողություն, մինչդեռ Ռուսաստանը նման փորձ ունի։
Տարածաշրջանում ԱՄՆ նպատակների շարքում փորձագետը նշել է Դոնալդ Թրամփի ցանկությունը՝ ընդգծելու իր դերը պատերազմի ավարտի գործում։ Հարավային Կովկասը Վաշինգտոնի համար հիմնական առաջնահերթություն չէ, բայց հետաքրքրություն է ներկայացնում Իրանի զսպման համատեքստում։ Ադրբեջանը զարգացնում է ռազմատեխնիկական համագործակցությունն Իսրայելի հետ և, ըստ Սիլաևի, պատրաստ է ընդլայնել համագործակցությունը Միացյալ Նահանգների հետ։
Նա նշել է, որ Հայաստանի և Ադրբեջանի միջև կայուն խաղաղություն դեռևս չի հաստատվել։ Դիվանագիտական հարաբերությունները չեն վերականգնվել, սահմանային հարցը չի լուծվել, և տրանսպորտային կապերը չեն բացվել։
Փորձագետը հատուկ ուշադրություն է դարձրել «Թրամփի երթուղի» անվամբ տրանսպորտային նախագծին։ 2020 թվականի հայտարարությունը ենթադրում էր, որ ռուս սահմանապահները կապահովեն այս ճանապարհի անվտանգությունը։ Սիլաևի խոսքով՝ նոր ձևաչափը ենթադրում է ամերիկյան կառույցի մասնակցությունը մոնիթորինգին և անվտանգությանը։ Նա ընդգծել է նաև իրավական բարդությունները, այդ թվում՝ Հայաստանի օրենսդրությունը փոփոխելու և Եվրասիական տնտեսական միության արտաքին սահմանի կարգավիճակը հաշվի առնելու անհրաժեշտությունը։ Հարցը վերաբերում է Ռուսաստանի շահերին՝ որպես ԵԱՏՄ-ում գործընկերոջ և հայ-իրանական սահմանին անվտանգության ապահովման մասնակցի։ Մասնագետը չի բացառել, որ Մոսկվան կարող է բարձրացնել ԵԱՏՄ-ում Հայաստանի մասնակցության հարցը։ Միությունից դուրս գալը տնտեսական հետևանքներ կունենա երկրի համար։ Նախաձեռնության իրականացումը կախված է խաղաղության պայմանագրի վավերացումից և Հայաստանում քաղաքական իրավիճակից։ Խորհրդարանական ընտրությունները կկայանան հունիսին, և դրանց արդյունքները կարող են ազդել «միջանցքի» վերաբերյալ հետագա որոշումների վրա։
Սիլաևի խոսքով՝ Ադրբեջանը ձգտում է ամրապնդել իր տարածաշրջանային առաջատարությունը վերջին տարիների իրադարձություններից հետո։ Ռուսաստանը, նրա խոսքով, գործում է զգուշորեն՝ հիմնվելով պրագմատիկ հաշվարկների և հարաբերությունները չսրելու ցանկության վրա։
