Մարդիկ մտնում են բժշկի մոտ, ասում են՝ ձրի է, գրի՛. բուժաշխատողները բողոքի ակցիա են արել ու նամակ հանձնել ԱԺ նախագահին
Այսօր բուժաշխատողները նամակներ են փոխանցել ԱԺ նախագահին ու խմբակցություններին՝ առողջության համապարփակ պարտադիր ապահովագրության բացերի և ռիսկերի վերաբերյալ խորհրդարանական լսումներ կազմակերպելու համար:
Շուրջ 30 տոկոս ցածր և ուշացումով ստացած աշխատավարձ, բուժծառայությունների սակագների նվազում, ծանրաբեռնվածության աճ և այլ խնդիրներ են բարձրաձայնում բուժաշխատողները: Նամակների հանձնման նպատակը մեկն է՝ լսելի դարձնել խնդիրները և փորձել համատեղ գտնել լուծումներ։
«Ամենամեծ բացը հախուռն մտնելն էր համակարգ, որովհետև առողջության ապահովագրությունը մեկնարկեց առանց պատշաճ իրազեկման՝ թե՛ բուժաշխատողներին իրենց անելիքների մասին, թե՛ քաղաքացիներին՝ իրենց իրավունքների», – ասաց «Առողջության իրավունք» ՀԿ-ի նախագահ Անուշ Պողոսյանը:
Իսկ բժիշկ Գևորգ Գրիգորյանը նշեց, որ բուժաշխատողներն ուզում են, որ գործի՛ ապահովագրության համակարգը, սակայն գործի արդյունավետ և չոտնահարվեն բուժաշխատողների շահերը։
«Մարդիկ գնում են, մտնում են բժշկի մոտ, ասում են՝ ձրի է, գրի՝ գնամ ՄՌՏ անցնեմ, գրի՝ գնամ ԿՏ անցնեմ: Չի՛ կարելի այդպես. ո՛չ բնակչությունն է պատրաստ, որ այդ ամենը ցուցումով պետք է լինի, ո՛չ բուժաշխատողներն են պատրաստ, որ պետք է հա՛մ պացիենտ բուժեն, հա՛մ պաշտպանվեն պացիենտներից», – ասաց Գևորգ Գրիգորյանը:
