Լուծարվելո՞ւ է անձնագրային բաժինը․ ՆԳՆ պատասխանը՝ ABC Media-ին
ABC Media-ն ՆԳՆ հարցում էր ուղարկել՝ պարզելու՝ ճի՞շտ է տեղեկությունը, որ համապետական ընտրությունից հետո լուծարվելու է անձնագրային բաժինը։ Եվ արդյոք ճի՞շտ է տեղեկությունը, որ այն լուծարվելուց հետո հանձնվելու է մասնավոր ընկերության։ Ի պատասխան մեր հարցման ՆԳՆ-ից նշել են․
«Հայաստանում նոր կենսաչափական համակարգի ներդրման արդյունքում Միգրացիայի և քաղաքացիության ծառայության (ՄՔԾ) կողմից մատուցվող ծառայությունների մի մասը կարտապատվիրակվի մասնավոր գործընկեր հանդիսացող «ՀայՓաս» ընկերությանը։ Գրասենյակներ կունենան և՛ ՄՔԾ-ն, և՛ մասնավոր գործընկերը։
Ըստ նախատեսված ծրագրի՝ Երևանում քաղաքացիների համար մատչելի և բանուկ հատվածներում հիմնված երկու ընդարձակ գրասենյակները հագեցած կլինեն ժամանակակից տեխնիկայով՝ կենսական տվյալների հավաքագրման «բոլորը մեկում» ինքնասպասարկման սարքերով, կահավորված սպասասրահներով և միջազգային ստանդարտի գրասենյակային այլ պայմաններով, ևս 21-22 գրասենյակ կբացվի մարզերում՝ նույնանման կահավորանքով և վերազինմամբ»,- ասվում է պաշտոնական պատասխանում։
Թե ՄՔԾ կողմից մատուցվող հստակ ո՞ր ծառայություններն են արտապատվիրակվելու մասնավոր ընկերությանը, չի նշվում։ Չի հստակվեցվում նաև առաջին հարցի պատասխանը։
