Թրամփի խորհրդականները նրան կոչ են արել շուտ ավարտել Իրանի հետ պատերազմը

ԱՄՆ նախագահ Դոնալդ Թրամփի մի շարք խորհրդականներ նրան կոչ են արել Իրանի դեմ պատերազմից դուրս գալու ծրագիր մշակել․ գրում է The Wall Street Journal-ը։ 

Կոչերը հնչում են նավթի գների աճի և այն մտավախությունների ֆոնին, որ երկարատև հակամարտությունը կունենա բացասական քաղաքական ազդեցություն։

Լրագրողների հետ զրույցում Թրամփը նշել է, որ Իրանի դեմ սկսված ռազմական գործողությունը հիմնականում հասել է իր առջև դրված նպատակներին։ Նա չի նշել պատերազմը դադարեցնելու հստակ ժամանակացույց՝ ասելով, սակայն, որ այն շատ շուտով կավարտվի։

Թրամփի վարչակազմի որոշ պաշտոնյաներ հայտարարել են, որ քանի դեռ Թեհրանը շարունակում է հարվածներ հասցնել տարածաշրջանի երկրների վրա, և քանի դեռ Իսրայելը ցանկանում է հարվածել իրանական թիրախներին, ԱՄՆ-ն դժվար թե կարողանա հեշտությամբ դուրս գալ պատերազմից։

WSJ-ն նշում է, որ վերջին օրերին Թրամփը պատերազմի վերաբերյալ տարբեր հակասական հայտարարություններ է արել։ Անցյալ շաբաթ նա հայտարարեց, որ ցանկանում է հասնել Իրանի անվերապահ կապիտուլիացիային՝ չբացառելով Իրան ցամաքային զորքեր ուղարկելու հավանականությունը։ Միևնույն ժամանակ, NYT-ին տված հարցազրույցում նա ասել է, որ չի պատրաստվում նման հրաման տալ։

Երկուշաբթի ԱՄՆ նախագահը խոսեց պատերազմի հնարավոր արագ ավարտի մասին՝ հավելելով, սակայն, որ ԱՄՆ-ն կարող է ավելի հեռու գնալ։ Նա նաև հրապարակավ ակնարկեց, որ կաջակցի Իրանի նոր գերագույն առաջնորդի սպանությանը, եթե նա չցանկանա կատարել ԱՄՆ պահանջները։