«Ես կծեցի Թրամփին, երբ նա փորձում էր սեռական ոտնձգություն կատարել իմ նկատմամբ»․ հրապարակվել են Էփշտեյնի գործով նոր փաստաթղթեր

ԱՄՆ արդարադատության նախարարությունը հրապարակել է Էփշտեյնի գործով նախկինում չհրապարակված փաստաթղթեր, որոնք ներառում են գրառումներ Հետաքննությունների դաշնային բյուրոյի (ՀԴԲ) հարցազրույցից մի կնոջ հետ, որը պնդում է, որ անչափահաս տարիքում նախագահ Դոնալդ Թրամփը բռնության է ենթարկել իրեն․ գրում է BBC-ն։

Արդարադատության նախարարությունը հայտարարել է, որ չէր հրապարակել փաստաթղթերը՝ սխալմամբ կարծելով, թե դրանք կրկնօրինակներ են։

Փաստաթղթերում ներառված է 2019 թվականին անցկացված հարցազրույցների շարք մի կնոջ հետ, որը Թրամփին և Էփշտեյնին մեղադրել է իր նկատմամբ սեռական ոտնձգություն կատարելու համար, երբ ինքը 13-15 տարեկան էր։ Կինը հարցազրույցի ժամանակ ասել է, որ իրեն Թրամփի հետ ծանոթացրել է Էփշտեյնը 1980-ականներին, երբ ինքը դեռահաս էր։

CBC-ն նշում է, որ կինը կապ է հաստատել ՀԴԲ-ի հետ Էփշտեյնի՝ 2019 թվականի ձերբակալությունից կարճ ժամանակ անց և պնդել, որ 1980-ականներին, երբ ինքը մոտ 13 տարեկան էր, Հարավային Կարոլինա նահանգի Հիլթոն Հեդ քաղաքում բնակվող Ջեֆ անունով մի տղամարդ բռնաբարել է իրեն։ Նա հավելել է, որ այդ ժամանակ չգիտեր տղամարդու ինքնությունը, բայց տասնամյակներ անց, երբ իր ընկերներից մեկն իրեն է ուղարկել լրատվական հոդվածից վերցրած Էփշտեյնի նկարը, ինքը հասկացել է, որ նա Ջեֆրի Էփշտեյնն էր։

Նշվում է, որ կինը 4 անգամ հարցաքննվել է ՀԴԲ գործակալների կողմից։ Նրա խոսքով՝ Էփշտեյնը փորձել է իր մորը բանտ ուղարկել, ծեծել է իրեն, սեռական հարաբերությունների համար հանդիպումներ կազմակերպել այլ տղամարդկանց հետ, իսկ մեկ անգամ էլ 80-ականների կեսերին ինքնաթիռով նրան տարել է Նյու Ջերսի կամ Նյու Յորք՝ Թրամփի հետ հանդիպելու, որտեղ նա կծել է Թրամփին, երբ վերջինս փորձել է սեռական ոտնձգություն կատարել իր նկատմամբ։

Փաստաթղթերում նշվում է, որ կինն ի վերջո հրաժարվել է պատասխանել լրացուցիչ հարցերի՝ խզելով ՀԴԲ գործակալների հետ կապը։

Նոր հրապարակված մեղադրանքներին ի պատասխան՝ Սպիտակ տունը հայտարարել է, որ դրանք «լիովին անհիմն» են։