ՀՀ իշխանությունը ճնշում է ընդդիմությանը՝ փոխելով ընտրական խաղի կանոններն ընտրությունից մի քանի շաբաթ առաջ․ Известия
Հայաստանի իշխանությունները շտապել են փոփոխություններ կատարել Ընտրական օրենսգրքում։ Հիմնական փոփոխությունն այն է, որ կուսակցությունների դաշինքի անվանումը չի կարող պարունակել անուն կամ ազգանուն։ Այս որոշումը հարված է խոշոր ընդդիմադիր ուժերին, և նախևառաջ՝ Սամվել Կարապետյանի կուսակցությանը, որի անվան մեջ ներառված է նրա անունը․ գրել է Известия-ն։
Կայքն ընդգծել է, որ փոփոխությունն իրականացվել է չափազանց շտապողականորեն։ Մինչև ընտրությունը մնացել է ընդամենը երկու ամիս. երկրի Կենտրոնական ընտրական հանձնաժողովն ապրիլի 13-ին կսկսի գրանցել դաշինքները քարոզարշավին մասնակցելու համար։ Սա նշանակում է, որ ընդդիմությունը քիչ ժամանակ ունի փոփոխություններ կատարելու համար։
Հատկանշական է, որ ընդունված որոշումը հակասում է եվրոպական կառույցների առաջարկություններին, որոնց իշխող կուսակցությունը ցանկանում է միանալ։ Եվրոպայի խորհրդի խորհրդարանական վեհաժողովի (ԵԽԽՎ) Վենետիկի հանձնաժողովը պահանջում է, որ ընտրական օրենսդրությունը չփոփոխվի ընտրություններից մեկ տարի առաջ։ Սակայն Հայաստանի կառավարության պաշտոնյաները պնդում են, որ այս առաջարկությունը վերաբերում է միայն իրավական հիմքերին, ինչպիսիք են քվեարկության ընթացակարգերը և ընտրական հանձնաժողովների անդամակցությունը, մինչդեռ «տեխնիկական փոփոխությունները», ենթադրաբար, թույլատրվում են։
Լրատվամիջոցը շեշտել է, որ սա կառավարության առաջին հարձակումը չէ ընդդիմության վրա։
Ըստ փորձագետ Վիկտոր Նադեին-Ռաևսկու՝ ՀՀ իշխանությունները վերացնում են ճանապարհին առկա բոլոր խոչընդոտները։
«Մենք տեսանք կատաղի պայքար Հայ եկեղեցու դեմ, որի ընթացքում ձերբակալվել են վեց եպիսկոպոսներ, խիստ սահմանափակվել են Գարեգին II կաթողիկոսի տեղաշարժերը, և պահանջներ են ներկայացվել նրա հրաժարականի համար։ Այժմ մենք տեսնում ենք քաղաքական ընդդիմության վրա ճնշում, քանի որ ընտրական խաղի կանոնները փոխվում են ընտրության օրվանից մի քանի շաբաթ առաջ»,- նշում է նա։
Մասնագետի խոսքով՝ անակնկալներ հնարավոր են նաև քվեարկության ժամանակ, մասամբ այն պատճառով, որ հայկական ընդդիմությունը բավականին թույլ է։
«Իշխող կուսակցության վարկանիշը ցածր է, բայց նրա հակառակորդների միավորները ևս ցածր են։ Դեռևս չկան նշանակալի դեմքեր, որոնք կարող են դեմ լինել Փաշինյանին»,- նշել է նա։
