Օպերատիվ արձագանքելը, հետևանքների վերացնելը շատ կարևոր է, բայց առաջնայինը կանխարգելելն է․ Շահեն Շահգելդյանը՝ Լոռու ջրհեղեղի մասին
Հայաստանի համար բավական մեծ աղետ է տեղի ունեցել՝ հասցնելով մարդկային ու նյութական կորուստներ։ Լոռու մարզում նման դեպք եղել է մոտ 15 տարի առաջ։ ABC media-ի հետ զրույցում ասել է Արտակարգ իրավիճակների նախկին նախարար Շահեն Շահգելդյանը։
«Այն, որ Լոռու մարզը բնական այս աղետի համար ռիսկային գոտի է, գաղտնիք չէ։ Ենթադրում եմ, որ մեծ վնաս է հասցվել գյուղատնտեսությանը։ Այն պետք է հաշվարկի ու ներկայացնի ստեղծված օպերատիվ շտաբը։ Բացի արձագանքումից՝ պետք է նրանք հետևանքները վերացնեն»,- ասել է Շահգելդյանը։
Օպերատիվ արձագանքելը, հետևանքների վերացնելը շատ կարևոր է, բայց առաջնայինը կանխատեսելն է՝ ընդգծել է Շահգելդյանը։
«Հետևանքները վերացնելը ավելի ծախսառատ է պետության համար, քան նախօրոք կանխատեսելն ու կանխարգելելը։ Անհրաժեշտ է վերլուծություն ունենալ ամբողջ մարզի ջրահեռացման և բնական աղետների դեմ պայքարի ենթակառուցվածների մասին։ Հասկանում եմ, որ այս գործընթացը կապված է մեծ ծախսերի հետ, բայց կան միջազգային մի շարք հիմնադրամներ, ծրագրեր, համակարգեր, որից կարելի է օգտվել։ Ժամանակին մենք փորձել ենք աշխատել մասնավորապես Եվրոպական ապահովագրական համակարգերի հետ աշխատել»,- ասել է Շահեն Շահգելդյանը։
Արտակարգ իրավիճակների նախկին նախարարը անհրաժեշտ է համարում առավել վտանգավոր հատվածներում փոխել ենթակառուցվածքնեը, հակառակ դեպքում աղետը անխուսափելի է լինելու նաև հետագայում։ Բնական աղետներից ապահովագրված չէ Հայաստանը, բայց պաշտպանվելու, խուսափելու համար աշխատանքներ կարող է տանել՝ ընդգծել է Շահգելդյանը։
Հիշեցնենք՝ հորդառատ անձրևների հետևանքով Լոռու մարզում ջրհեղեղ է։ Արդյունքում 2 մարդ զոհվել է, 20-ը՝ վիրավորվել։
