Դուք զենք վերցրեք, կանգնեք իմ կողքին, միասին գնանք․ ԳՇ պետը՝ լրագրողին

Ծառայություն իրականացնում են Սահմանապահ զորքերը, Զինված ուժերն էլ իրենց նախորոշված հատվածներում կատարում են իրենց խնդիրը․ ԱԺ-ում լրագրողների հետ զրույցում ասել է ՀՀ ԶՈՒ ԳՇ պետի Էդուարդ Ասրյանը։

Լրագրողները ԳՇ պետին բազմաթիվ հարցեր են տվել Տավուշում իրականացված սահմանազատման ու սահմանագծման աշխատանքների վերաբերյալ, Ջերմուկում ստեղծված իրավիճակի մասին, սակայն Ասրյանը խուսափել է պատասխանել հարցերին։
 
«Բանակն այնտեղ է, բանակը չի կարող ոչ մի տեղից դուրս գալ։ Սահմանապահ զորքերը, որտեղ իրականացնում են ծառայություն, ևս բանակի պատասխանատվության գոտի է, որտեղ մենք պատրաստ ենք իրականացնել պաշտպանություն»,- ասել է ԳՇ պետը։
 
Լրագրողներից մեկի հարցին՝ արդյոք Տավուշից հանձնված տարածքները դե յուրե Հայաստանի տարածք չէին, Ասրյանը պատասխանել է․ «Այո, վստահ եմ»։
 
«Դուք անձամբ զենք վերցրեք, եկեք, կանգնեք իմ կողքը ու միասին կգնանք»,- լրագրողներից մեկի հարցին, թե ինչու ադրբեջանական զորքը մինչև հիմա դուրս չի եկել Ջերմուկի տարածքից, պատասխանել է ԳՇ պետը։