Պաշտպանության նախարարությունն այսօր տեղեկություն տարածեց չպարզված հանգամանքներում պայմանագրային զինծառայողի մահվան մասին: Կյանքի հետ անհամատեղելի հրազենային վնասվածք ստացած զինծառայողը Սարգիս Արթուրի Խաչատրյանն է:
Սա այս տարվա ընթացքում բանակում գրանցված 17֊րդ կորուստն է: Նրանցից 4֊ն են զոհվել հակառակորդի կրակից:
Հունվարի 9֊ին հայտարարվել էր չպարզված հանգամանքներում 2 պայմանագրային զինծառայողների մահվան մասին՝ Կարեն Արայիկի Կարապետյան և ավագ լեյտենանտ Միքայել Սամվելի Դանիելյան:
Հունվարի 13-ին եղանակային խիստ անբարենպաստ պայմաններում մարտական դիրքից մշտական տեղակայման վայր տեղափոխվելու ճանապարհին կորել էր կապը ժամկետային զինծառայող Բենիամին Մանուչարյանի հետ: Ավելի ուշ հայտնաբերվել էր նրա մարմինը:
Փետրվարի 6-ին՝ ժամը 13:20-ի սահմաններում, ՊՆ N զորամասի պահպանության տեղամասի մարտական դիրքի կացարանին կից տեղադրված տնակում դեռևս չպարզված հանգամանքներում բռնկված հրդեհի հետևանքով մահացել էր պահեստազորային Արթուր Վարուժանի Գրիգորյանը:
Փետրվարի 13-ին Ներքին Հանդի հատվածում տեղակայված հայկական դիրքերի ուղղությամբ Ադրբեջանի ԶՈՒ կրակի հետևանքով հայկական կողմն ուներ 4 զոհ` Էդուարդ Համլետի Հարությունյան, Գագիկ Վարազդատի Մանուկյան, Արսեն Գագիկի Համբարձումյան, Հրաչյա Թալիշի Հովհաննիսյան։
Փետրվարի 24-ին՝ ժամը 17:55-ի սահմաններում, դեռևս չպարզված հանգամանքներում մահացել է ՊՆ N զորամասի զինծառայող Ավագ Դանիելի Զաքարյանը:
Ապրիլի 12-ին 4 զինծառայող էր զոհվել «Ուրալ» մակնիշի ավտոմեքենայի վթարի հետևանքով. Արեգ Արմենի Քերոբյան, Սլավիկ Վարդանի Վարդանյան,Դավիթ Համբարձումի Հակոբյան, Ժոզեֆ Մելքոնի Ազոլյան։
Մայիսի 7-ին՝ ժամը 14:00-ի սահմաններում, ՊՆ N զորամասի պահպանության տեղամասում հայտնաբերվել է պայմանագրային զինծառայող Արտակ Սերյոժայի Ավալյանի (ծնվ. 1985 թ.) դին՝ հրազենային վնասվածքով:
Մայիսի 26-ին դեռևս չպարզված հանգամանքներում կյանքի հետ անհամատեղելի վնասվածքներ է ստացել ՊՆ N զորամասի զինծառայող Արարատ Արամի Արոյանը:
Հունիսի 14-ին՝ ժամը 08:20-ի սահմաններում, ՀՀ ՊՆ N զորամասի պահպանության տեղամասում հայտնաբերվել է պայմանագրային զինծառայող Արմեն Գուրգենի Գասպարյանի դին՝ հրազենային վնասվածքով:
