Հայաստանը բավականին երկար ժամանակ գնում է Արևմուտքի հետ մերձեցման, սակայն այս ամառ նոր միտում է ի հայտ եկել, գրել է Известия-ն: Եթե նախկինում խոսքը քաղաքական և դիվանագիտական փոխգործակցության մասին էր, ապա այժմ առավել ինտենսիվ է զարգանում ռազմական համագործակցությունը։
Վերջին շրջանում ամերիկացի պաշտոնյաների շատ նշանակալից այցելություններ են եղել, մինչդեռ Հայաստանի հարաբերությունները Ռուսաստանի և նրա դաշնակիցների հետ, ընդհակառակը, մնում են բարդ։ Բացի այդ՝ Հայաստանը շարունակում է ՀԱՊԿ-ի հետ հարաբերությունները խզելու քաղաքականություն վարել։
Ռուս քաղաքագետ Անդրեյ Արեշևի խոսքով՝ Հայաստանը հետևողականորեն թեքվում է դեպի Արևմուտք: «Հայաստանի իշխանություններն աշխարհաքաղաքական աճուրդի են հանել իրենց հանրապետությունը: Դա արվում է Անդրկովկասում Ռուսաստանի դիրքերի թուլացման ֆոնին: Չեմ կարծում, որ այս առևտուրը որևէ հաջողության կհանգեցնի: Դժվար թե ԱՄՆ-ն կամ որևէ մեկը ստանձնի Հայաստանին պաշտպանելու պարտավորությունները: Ամենայն հավանականությամբ, համագործակցություն կլինի առանձին հարցերի և կոնկրետ նախագծերի շուրջ»,- նշել է նա։
Рыбарь տելեգրամյան ալիքը գրել է, որ ՀԱՊԿ-ի հետ համատեղ զորավարժություններից Հայաստանի ներկայացուցիչների հրաժարվելու մասին լուրերը միանգամայն կանխատեսելի են՝ հաշվի առնելով ՀՀ իշխանությունների վերջին դեմարշները: Նման լուրերի մեդիա էֆեկտը կարևոր է Հայաստանի կառավարության և նրա համակարգողների համար։ Ի վերջո, ԱՄՆ-ն չի թաքցնում Հայաստանում իր քաղաքականության նպատակները՝ խզել հարաբերությունները Ռուսաստանի հետ։ Այդ նպատակով՝ ամերիկացիները, ինչպես նաև իրենք՝ Հայաստանի իշխանությունները, Ադրբեջանի հետ պատերազմում Հայաստանի պարտության պատասխանատվությունը բարդում են Ռուսաստանի Դաշնության վրա։
«Միևնույն ժամանակ, Վաշինգտոնը խրախուսում է երկրների միջև խաղաղության համաձայնագրի շուտափույթ ստորագրումը հենց թուրք-ադրբեջանական պայմաններով։ ՀՀ պաշտպանության նախարարությունը շուտով ռազմական խորհրդական ձեռք կբերի ԱՄՆ-ից, իսկ վերջերս ամերիկացիներն արդեն վարժանքներ են անցկացրել հայերի հետ, այդ թվում՝ կենտրոնանալով զանգվածային անկարգությունները ճնշելու վրա։ Ակնհայտ է, որ շուտով կարող ենք ակնկալել հայտարարություններ կազմակերպությունից ամբողջովին դուրս գալու մասին», – նշվել է գրառման մեջ։
