Իրանի հետ Հայաստանի առևտրային կապերն ընտրության հարց չեն, այլ՝ անհրաժեշտության. նախկին դեսպան
Իրանի հետ Հայաստանի առևտրային կապերն ընտրության հարց չեն, այլ անհրաժեշտության՝ թելադրված աշխարհագրության և աշխարհաքաղաքական իրողություններով, The Jerusalem Post-ի համար գրել է ԱՄՆ–ում Հայաստանի նախկին դեսպան և նախկին փոխարտգործնախարար Գրիգոր Հովհաննիսյանը:
Դիվանագետն անդրադարձել է լուրերին, թե ՀՀ–ն և Իրանը ստորագրել են 500 միլիոն դոլարի զենքի մատակարարման պայմանագիր: Նա շեշտել է, որ այս պնդումը կտրականապես հերքվել է այդուհանդերձ, The Jerusalem Post-ում տեղ գտած Մորդեխայ Կեդարի հրապարակումը նման գործարքը ներկայացնում է որպես փաստ՝ վկայակոչելով Iran International-ը և անտեսում հերքումը։ Ըստ Հովհաննիսյանի՝ աշխարհում կան ուժեր, որոնք ձգտում են սեպ խրել հայերի և հրեաների միջև։ Նրանք կեղծ լուրեր են տարածում Հայաստանում ենթադրյալ հակասեմիտիզմի մասին: Դիվանագետն ընդգծել է, որ Իրանի հետ Հայաստանի առևտրային կապերը ընտրության հարց չեն, այլ՝ անհրաժեշտության՝ թելադրված աշխարհագրության և աշխարհաքաղաքական իրողություններով։ Ծով ելք չունեցող և թշնամական հարևանների կողմից մեկուսացված՝ Հայաստանի առևտրային գործընկերության տարբերակները սահմանափակ են։ Իրանը արտաքին աշխարհ տանող սակավաթիվ կենսունակ դարպասներից մեկն է, որը կարևոր փրկություն է առաջարկում առևտրային և էներգետիկ ոլորտներին:
«Հաշվի առնելով իր անկայուն վիճակը՝ Հայաստանը չունի գաղափարական մոտեցումների կամ հարմարության հիման վրա գործընկերներին ընտրելու շքեղությունը: Իրանը, չնայած իր միջազգային վիճելի դիրքին, Հայաստանին տրամադրում է մուտք դեպի ապրանքներ և շուկաներ, որոնց այլապես բավականին դժվար կլինր հասնել և, ըստ էության, դեպի փոքր, բայց արագ զարգացող տնտեսություն», – նշել է Հովհաննիսյանը:
