Աշխատանքի և սոցիալական հարցերի նախարարությունը Արցախից բռնի տեղահանված մեր հայրենակիցներին աջակցելու նպատակով մի քանի ծրագիր էր իրականացնում։ «2023 թվականին Լեռնային Ղարաբաղից բռնի տեղահանված անձանց համար կարճաժամկետ ուսուցման դասընթացի կազմակերպման եւ աշխատանքային փորձ ձեռք բերելու համար աջակցության տրամադրման ծրագիրը հաստատելու մասին» ծրագրի երրորդ բաղադրիչում նշված էր, որ նախարարությունը մինչև 6 ամիս ժամկետով կազմակերպում է շահառուի մասնագիտական ուսուցման գործընթաց, որի ընթացքում վերջինիս ամսական կտրվածքով վճարում է առավելագույնը 50,000 դրամ՝ ուսման վարձի փոխհատուցման համար և ևս 50,000 դրամի չափով կրթաթոշակ։
ABCmedia-ին արցախցի գործարարներից մեկը խնդրել է պարզել՝ արդյոք այդ ծրագիրը գործու՞մ է հավուր պատշաճի, թե՞ փոփոխություն է կատարվել։ Ըստ այդ գործարարի՝ դիմել է նախարարությանը՝ ծրագրից օգտվելու համար։ Նախարարությունից տեղեկացրել են, որ, այսպես կոչված, «ներքին կարգով» փոփոխություն է կատարվել։
ABCmedia-ի հարցմանն ի պատասխան՝ նախարարությունը նշել է, որ հունիսի 20-ին «2023 թվականին Լեռնային Ղարաբաղից բռնի տեղահանված անձանց համար կարճաժամկետ ուսուցման դասընթացի կազմակերպման եւ աշխատանքային փորձ ձեռք բերելու համար աջակցության տրամադրման ծրագիրը հաստատելու մասին» N 57-Լ որոշման մեջ կատարվել է փոփոխություն։
Արցախցի գործարարը մեզ հետ զրույցում նշել էր, որ նախարարությունը մերժել է նրան իր բարեկամ աշխատողին 3 ամիս ժամկետով աշխատավարձի վճարման համար։ Նախարարությունը պատասխանել է․
«Ընտանիքի անդամների (մոտ ազգականների) միջեւ զբաղվածության պետական ծրագրի իրականացման պայմանագրեր չեն կնքվում՝ հիմք ընդունելով ՀՀ դատախազության կողմից ՀՀ աշխատանքի եւ սոցիալական հարցերի նախարարությանը տրված ցուցումը»,-ասված էր պաշտոնական պատասխանում:
ABC media-ն հետևողական է այս հարցում և պարզելու է կատարված փոփոխություններն ու ներկայացնի այն ընթերցողներն։
