Հայաստանը վերածվել է համաշխարհային տերությունների միջև ինտենսիվ մրցակցության ասպարեզի․ EADaily

Համաշխարհային տերությունները վերջերս սկսել են ավելի մեծ ուշադրություն ցուցաբերել Հայաստանի նկատմամբ, գրել է EADaily-ին։ Սեպտեմբերի 13-14-ը աշխատանքային այցով հանրապետությունում էր ՌԴ պատվիրակությունը՝ փոխվարչապետ Ալեքսեյ Օվերչուկի գլխավորությամբ։ Իսկ սեպտեմբերի 16-ին Հայաստանի մայրաքաղաք  է այցելել Ֆրանսիայի ԱԳ նախարար Ստեֆան Սեժուրնեն, ով հաստատել է Փարիզի հավատարմությունը պաշտպանական ոլորտում Երևանի «խնամակալությունը» ստանձնելու հարցում:

Հայ-ֆրանսիական հարաբերությունների խիտ ու բավական ծավալուն օրակարգն աստիճանաբար ընդլայնվում է դեպի պաշտպանության ոլորտ։ Հատկանշական է, որ նախարարի Երևանում հայտնվելուց օրեր առաջ Հայաստանի ռազմական ակադեմիայի պատվիրակությունն այցելել է Ֆրանսիայի պաշտպանության նախարարություն և Սեն-Սիր զինվորական ակադեմիա։

Ռազմական ոլորտում երկու երկրների համագործակցության բարձր տեմպերը որոշ փորձագետների հիմք են տվել ենթադրելու, որ Ֆրանսիան մտադիր է դառնալ Հայաստանի «ուղեցույցը» դեպի ՆԱՏՕ։ Սակայն Հայաստանի իշխանությունները գերադասում են չխոսել ՆԱՏՕ-ին անդամակցելու իրենց հիպոթետիկ ցանկության մասին, համենայն դեպս՝ հանրայնորեն։ Մեկ այլ բան է, որ նրանք անընդհատ նշում են պաշտպանության և այլ ոլորտներում հիմնական գործընկերների հետ հարաբերությունների «դիվերսիֆիկացման» մասին։

«Հայաստանը վերածվել է համաշխարհային տերությունների միջև ինտենսիվ մրցակցության ասպարեզի։ Նույնիսկ եթե ենթադրենք, որ Նիկոլ Փաշինյանին հաջողվի առաջիկա տարիներին համեմատաբար հաջող դիվանագիտական և ռազմաքաղաքական մանևրումներ կատարել, վերը նշված «դիվերսիֆիկացիան» կարող է ծայրահեղ վտանգավոր հետևանքներ ունենալ», – գրել է կայքը։

Հատկանշական է, որ Հայաստանի արտաքին քաղաքական երեք առաջատար գործընկերները մնում են Ռուսաստանը, ԱՄՆ-ն և Ֆրանսիան՝ ԵԱՀԿ Մինսկի խմբի երեք համանախագահները, որոնք մինչև 2020 թվականի 44-օրյա պատերազմը ներգրավված էին ղարաբաղյան հակամարտության կարգավորման գործընթացում։ Ուկրաինայում հատուկ ռազմական գործողության մեկնարկից հետո համանախագահության ձևաչափը փաստացի քայքայվել է, թեև դա դեռևս չի ձևակերպվել միջազգային իրավական առումով։