Իրանցի հաքերները գողացել են տեղեկություններ Դոնալդ Թրամփի նախընտրական շտաբից և ուղարկել Ջո Բայդենի նախընտրական շտաբ։ Այս մասին հայտնել են Հետաքննությունների դաշնային բյուրոն և ԱՄՆ հետախուզական ծառայությունները․ հաղորդում է BBC-ին։
«Հաքերները, սեփական նախաձեռնությամբ, նամակներ են ուղարկել նախագահ Բայդենի նախընտրական շտաբի հետ առնչություն ունեցող անձանց։ Նամակները պարունակել են նախկին նախագահ Թրամփի քարոզարշավից գողացված, ոչ հրապարակային նյութերից հատվածներ», – նշվել է համատեղ հայտարարության մեջ:
Հետախուզական գործակալություններին տվյալներով՝ Բայդենի քարոզարշավի մասնակիցներից ոչ ոք չի պատասխանել այդ նամակներին։ Իրադարձությունը տեղի է ունեցել այս տարվա հունիսին և հուլիսին՝ մինչ Բայդենի թեկնածության հանելը։
Ըստ հաղորդագրության՝ իրանցիները Թրամփի քարոզարշավից գողացված տեղեկատվությունն ուղարկել են նաև ամերիկյան մամուլին։
ԱՄՆ պաշտոնյաները դեռ օգոստոսին հայտարարել էին, որ Իրանը նոյեմբերին կայանալիք նախագահական ընտրություններից առաջ փորձում է մեծացնել տարաձայնությունները ԱՄՆ-ում և խաթարել քաղաքացիների հավատը պետության ինստիտուտների նկատմամբ: Ամերիկյան իշխանությունների այդ հայտարարությունների համաձայն՝ իրանցիները փորձել են ուղղակի մուտք ունենալ Հանրապետական և Դեմոկրատական կուսակցությունների շտաբներ՝ օգտագործելով, մասնավորապես, «սոցիալական ինժեներիայի» մեթոդները։
Դոնալդ Թրամփի նախընտրական շտաբի խոսնակ Քերոլայն Լիվիթը BBC-ին հայտնել է, որ ՀԴԲ-ն և հետախուզության հայտարարությունն ապացուցում է, որ Իրանը ցանկանում է օգնել Քամալա Հարիսին և Ջո Բայդենին: Ըստ խոսնակի՝ Իրանում քաջատեղյակ են, որ Թրամփը կվերադարձնի կոշտ պատժամիջոցները։
Քամալա Հարիսի քարոզարշավի խոսնակ Մորգան Ֆինկելշտեյնը հայտնել է, որ իրենք իրավապահների հետ գործակցում են այն պահից ի վեր, երբ իմացել է հաքերության մասին:
