COP29–ին բոլոր այցելողներն իրենց պարտքը պետք է համարեն Բաքվին կոչ անել ազատ արձակել պատանդներին. ԵԽ պատգամավոր

Բոլոր նրանք, որոնք այցելելու են Բաքու՝ մասնակցելու COP29–ին, պետք է իրենց բարոյական պարտքը համարեն՝ կոչ անելու ապահովել բռնի տեղահանված անձանց վերադարձը Լեռնային Ղարաբաղ և ազատ արձակել պատանդներին։ «Արմենպրես»-ի հաղորդմամբ՝ այս մասին ասել է Եվրոպական խորհրդարանի պատգամավոր Նատալի Լուազոն ԵԽ նիստում:

Նա հիշեցրել է, որ մեկ տարի առաջ Ադրբեջանն իրականացրել է ռազմական հարձակում Լեռնային Ղարաբաղի նկատմամբ և բռնի տեղահանել ավելի քան 100 000 անձանց՝ այս կերպ պատմության մեջ թողնելով 21-րդ դարի առաջին էթնիկ զտման հետքը։ Եվ մեկ տարի անց ոչ մեկ դեռևս հնարավորություն չունի վերադառնալու իր տուն։

«Ադրբեջանը շարունակում է պատանդ պահել նախորդ հակամարտության գերիներին, և նրանք ևս հնարավորություն չունեն վերադառնալու տուն։ Լեռնային Ղարաբաղի հոգևոր և մշակութային ժառանգությունը սպառնալիքի առջև է կանգնած, և բազում հուշակոթողներ արդեն իսկ ոչնչացվել են։ Ադրբեջանը չի ստորագրել խաղաղության համաձայնագիր Հայաստանի հետ և մի քանի շաբաթից հյուրընկալելու է «COP29» համաժողովը: Բոլոր նրանք, որոնք այցելելու են Բաքու, իրենց բարոյական պարտքը պետք է համարեն՝ կոչ անելու ապահովել վերադարձը Լեռնային Ղարաբաղ և ազատ արձակել պատանդներին»,-ասել է Լուազոն։