Իրանա-ռուսական հարաբերությունները կարգավորվում են․ Կրեմլը խոնարհվում է Թեհրանի ցանկությունների առաջ․ Eurasianet
Իրանի հետ Ռուսաստանի հարաբերությունները, կարծես, հունի մեջ են ընկել այն բանից հետո, երբ հայ-ադրբեջանական խաղաղ գործընթացի հետ կապված վեճը սպառնում էր խզել նոր ռազմավարական գործընկերությունը, գրել է Eurasianet-ը:
Թվում է, թե Կրեմլը, հաշվի առնելով պատերազմական ժամանակաշրջանում իր տնտեսությունը պահպանելու մարտահրավերները, ընդունել է իրանական կողմի ցանկությունները՝ վիճահարույց «Զանգեզուրի միջանցքը» տարածաշրջանային աշխարհաքաղաքական օրակարգից դուրս թողնելու հարցում։
Սեպտեմբերի 17-ին Ռուսաստանի Անվտանգության խորհրդի քարտուղար Սերգեյ Շոյգուի այցը Թեհրան, կարծես թե, հարթել է հարաբերությունները:
Ուկրաինայում պատերազմի մեկնարկից հետո Իրանը Ռուսաստանի համար արագորեն դարձել է կենսական գործընկեր՝ օգնելով Կրեմլին շրջանցել արևմտյան պատժամիջոցները։
Այդուամենայնիվ «Զանգեզուրի միջանցքի» պատճառով՝ ըստ տեղեկությունների, կուլիսներում Թեհրանը սպառնացել է նվազեցնել երկկողմ հարաբերությունները, ինչպես նաև դադարեցնել ռազմավարական գործընկերության համաձայնագրի կնքման շուրջ բանակցությունները:
Այնուհետև երկու կողմերն էլ որոշել են զբաղվել վնասների վերահսկմամբ։ Մինչ Իրանի Ազգային անվտանգության բարձրագույն խորհրդի քարտուղար Ալի Ահմադյանը Սանկտ Պետերբուրգում էր՝ մասնակցելու BRICS-ի անդամ երկրների հանդիպմանը, նա հանդիպել է նաև Ռուսաստանի նախագահ Վլադիմիր Պուտինի հետ: Մի քանի օր անց Շոյգուն անսպասելիորեն հայտնվել է Թեհրանում, որտեղ հանդիպել է Ահմադիանի հետ և Իրանի ղեկավարությանը փոխանցել Պուտինի անձնական ուղերձը: Հաղորդագրության մեջ ասվում է, որ «Իրանի հետ տարածաշրջանային համագործակցության հարցում Ռուսաստանի դիրքորոշումը չի փոխվել»։
Ռուսական պետական վերահսկողության տակ գտնվող լրատվամիջոցները շատ մանրամասներ չեն հաղորդել Թեհրանում Շոյգուի քննարկումների մասին: Սակայն ТАСС լրատվական գործակալությունը նշել է, որ «հատուկ ուշադրություն է դարձվել Իսլամական Հանրապետության դիրքորոշմանն Ադրբեջանից և դեպի Ադրբեջան տրանսպորտային ուղիների և միջանցքների հարցում»։
Իրանի պաշտոնական լրատվական գործակալությունը՝ IRNA-ն, առաջարկել է ավելի ուղիղ տարբերակ: «Իրանցի գործընկերոջ հետ հանդիպման ժամանակ Շոյգուն քննարկել է երկու երկրների միջև ձեռք բերված պայմանավորվածությունները և վերահաստատել իր աջակցությունն Ադրբեջանի Հանրապետության հետ միջանցքների և տրանսպորտային ուղիների հարցում Իրանի Իսլամական Հանրապետության քաղաքականությանը»:
