Մեծ Բրիտանիայում Ադրբեջանի դեսպանը գնահատել է ՀՀ-ի դերը Cop29-ը Բաքվում հյուրընկալելու հարցում
Մեծ Բրիտանիայում Ադրբեջանի դեսպան Էլին Սուլեյմանովը պատասխանել է The Guardian-ի հոդվածին, որտեղ նշվել է՝ COP29-ի խաղաղության գաղափարը ցինիկ PR հնարք է՝ շեղելու աշխարհի ուշադրությունը Արցախում էթնիկ զտումներից։ Կոնֆերանսի ընթացքում, և դրանից մեկ շաբաթ առաջ և հետո, Ադրբեջանը կոչ է անում բոլոր երկրներին, որոնք հակամարտություններ ունեն, վայր դնել զենքերը։ Ըստ դեսպանի՝ այս նախաձեռնությունը նման է օլիմպիական զինադադարին։
«Ադրբեջանի հակամարտությունը մեր հարևան Հայաստանի հետ տևել է ավելի քան երեք տասնամյակ։ Այնպես որ, պետք չէ թերագնահատել Հայաստանի աջակցությունը՝ Cop29-ը Բաքվում հյուրընկալելու համար: Խաղաղությունը, որն անցնում էր մեր ազգերի կողքով 30 տարի շարունակ, վերջապես հասել է», – նշել է Սուլեյմանովը՝ չմոռանալով հիշեցնել, որ աշխարհի բոլոր երկրները, ներառյալ Հայաստանի ներկայիս ղեկավարությունը, ճանաչում են Արցախը որպես Ադրբեջանի ինքնիշխան տարածք:
«Մեր անհանգիստ տարածաշրջանում խաղաղությունը տասնամյակներ շարունակ անհնար էր պատկերացնել: Այն, որ մեր տարածաշրջանը, խաղաղ բանակցությունների անմիջական արդյունքում, այժմ կարող է ընդունել Cop29-ը, պետք է հույս տա աշխարհին նույնիսկ այս աշխարհաքաղաքական լարվածության աճի ժամանակներում», – նշել է դեսպանը:
