Միշուստինը Իրանի ղեկավարության հետ քննարկել է ԵԱՏՄ-ին անդամակցելու հարցը
Ռուսաստանի վարչապետ Միխայիլ Միշուստինը հայտարարել է, որ Թեհրանում կայացած բանակցություններում Իրանի նախագահ Մասուդ Փեզեշքիանի հետ մանրամասն քննարկել է Եվրասիական տնտեսական միությանն (ԵԱՏՄ) այս երկրի անդամակցության և ռուս-իրանական նախագծերի իրագործման հարցերը։
«Մանրամասն քննարկել ենք երկկողմ հարաբերությունների զարգացումը, պայմանավորվել ենք խորացնել ռուս-իրանական համագործակցությունը բոլոր ոլորտներում, հատուկ ուշադրություն ենք դարձրել էներգետիկայի, տրանսպորտային ենթակառուցվածքների, բարձր տեխնոլոգիաների, թվային տնտեսության ոլորտում համատեղ նախագծերի իրականացմանը։ Բավականին մանրամասն քննարկել ենք ԵԱՏՄ-ին Իրանի անդամակցության հարցը որպես դիտորդ երկիր»,- նշել է Միշուստինը ՌԴ կառավարության նիստում։
Նա նաև հույս է հայտնել, որ մոտ ապագայում ուժի մեջ կմտնի ԵԱՏՄ-ի և Իրանի միջև ազատ առևտրի համաձայնագիրը, որը «էապես կբարելավի ռուս արտահանողների աշխատանքային պայմանները իրանական շուկայում»։
Ռուսաստանի վարչապետի և Իրանի նախագահի բանակցությունները կայացել են սեպտեմբերի 30-ին։ Դրանից հետո Միշուստինը անմիջապես մեկնել է Հայաստան՝ մասնակցելու ԵԱՏՄ համաժողովին։
