Ուզում եմ դիմել ենթադրաբար Մայր օրենքը պահող, Սահմանադրությունը պահող այն դատավորներին, որոնք վերջերս իրենց մանիպուլյատիվ արարքով հերթական անգամ ապացուցեցին, որ իրենք որոշումներում անաչառ չեն և չեն կարողանում պահել ՀՀ պետական և ազգային շահերը. այս մասին ՍԴ-ի մոտ տեղի ունեցած ակցիայի ընթացքում ասել է Genesis Armenia ուղեղային կենտրոն/ հիմնադրամի տնօրեն, քգթ, դոցենտ Աբրահամ Գասպարյանը:
«Այն մեկնաբանությունը, որ դուք տվեցիք անկախության հռչակագրի որոշ դրույթների հետ կապված, պարզապես խայտառակում է ձեզ և այն ինստիտուտը, որը, ցավոք, դուք ներկայացնում եք: Համաշխարհային անվտանգային այս փխրուն իրավիճակում, Մայր օրենքի մեկնաբանման հարցում գնալ նման արկածախնդրության, նշանակում է ավելի թուլացնել Հայաստանի դիրքերը թե՛ ներքին, թե՛ արտաքին դաշտում»,- ասել է Աբրահամ Գասպարյանը: Նրա խոսքով՝ նման արկածախնդրությունը հանրությանը մատուցել որպես ՀՀ շահերին նպաստող քայլ, չի տեղավորվում առողջ բանականություն ունեցող, Հայաստանի ազգային ու պետական շահերով մտահոգ որևէ մարդու ուղեղում: «Ոստիկանական այս շղթան, որ այստեղ շրջապատել է, քիչ առաջ Կառավարության շենքի հետևում խցկված կարմիր և սև տարատեսակ բերետավորները, պաշտպանելում են ընդամենը մի մարդու՝ հայ ժողովրդից: Ոչ թե հայ ժողովրդին են պաշտպանում ազգակործան այս պատուհասից, այլ հակառակը: Իսկ քիչ առաջ, այն ներկայացումը, որ այստեղ ցույց տվեցին, սադրիչ հռետորաբանությունը, բանակցել չիմանալը, տարրական էթիկետ չունենալը պարզապես խոսում է այն մասին, որ տղերք, դուք վախեցած եք, դուք ահ ու սարսափի մեջ եք»,- ասել է Գասպարյանը: