Լևոն Արոնյանը` մրցակցի, հաղթանակի և հանդիսատեսի ներկայությունը կարևորելու մասին

Las Vegas Freestyle Chess 2025 մրցաշարում տարած հաղթանակից հետո Լևոն Արոնյանը հարցազրույց է տվել ChessBase India կայքին։

Եզրափակչում իր մրցակից Հանս Նիմանսի մասին խոսելիս՝ Արոնյանը նշել է, որ նա շնորհալի երիտասարդ շախմատիստ է, և որ ինքը գիտեր` Նիմանսը լուրջ մրցակից է, և դրան պատրաստ էր։

Լրագրողի հարցին՝ ի՞նչ է նշանակում իր համար այս հաղթանակը, Արոնյանը նշել է․ «Ես մեծ եզրակացություններ չէի անի սրանից, բայց կարող եմ ասել, որ ողջ եմ, պայքարում եմ, և ես շնորհակալ եմ դրա համար: Ես գնահատում եմ այն հնարավորությունը, որ կարող եմ խաղալ նման մեծ մրցաշարերում։ Դրանցում հաղթելը, իհարկե, մեծ արտոնություն և պատիվ է ինձ համար»:

Մրցաշարերի ժամանակ հանդիսատեսի ներկայության մասին հարցին, Արոնյանը նշել է, շատերն ասում էին, որ գուցե չպետք է թույլ տալ մարդկանց հեռախոսներ բերել, նկարել, գուցե պետք է սահմանափակել հանրության մուտքը։ Սակայն, Արոնյանի կարծիքով, եթե իրենք ուշադրություն չդարձնեն իրենց աջակցող հանրությանը, իրենց շրջանակը շատ կնեղանա, ինչն ինքը չի ցանկանում։