ChatGPT-ն փոփոխությունների կենթարկվի դեռահասի ինքնասպանությունից հետո

ChatGPT-ի ստեղծողները կփոխեն հոգեկան և հուզական ծանր վիճակում գտնվող օգտատերերին ցուցաբերվող արձագանքման ձևերը․ գրում է The Guardian–ը։

Փոփոխությունները տեղի են ունենում այն բանից հետո, երբ 16-ամյա Ադամ Ռեյնը չատբոտի հետ ամիսներ տևած զրույցներից հետո ինքնասպան է եղել, իսկ նրա ընտանիքը դատական հայց է ներկայացրել OpenAI ընկերության դեմ։

Ընկերությունն ընդունել է, որ իր համակարգերը կարող են «թերություններ ունենալ» և հայտարարել, որ 18 տարեկանից փոքր օգտատերերի համար կտեղադրի «ավելի ուժեղ պաշտպանիչ համակարգեր»։

Կազմակերպությունը նաև հայտարարել է, որ կներդնի ծնողական վերահսկողության համակարգ, որը ծնողներին հնարավորություն կտա «ավելի լավ պատկերացում կազմել, թե ինչպես են իրենց երեխաներն օգտագործում ChatGPT-ն», սակայն դեռևս մանրամասներ չի տրամադրել այն մասին, թե ինչպես են դրանք աշխատելու։

Նշենք, որ Ադամը ինքնասպան է եղել ապրիլին «ChatGPT-ի կողմից ամիսներ շարունակ տրված խրախուսանքից հետո»։ Դեռահասի ընտանիքը դատի է տվել Open AI-ին և դրա գլխավոր գործադիր տնօրեն և համահիմնադիր Սեմ Ալտմանին՝ պնդելով, որ ChatGPT-ի այդ ժամանակվա տարբերակը, որը հայտնի էր որպես 4o, «արագ շուկա է մտցվել՝ չնայած անվտանգության հետ կապված ակնհայտ խնդիրներին»։

Դեռահասը մի քանի անգամ, այդ թվում՝ ինքնասպանություն գործելուց կարճ ժամանակ առաջ, ChatGPT-ի հետ քննարկել է ինքնասպանության մեթոդը։ Դատարան ներկայացված հայցի համաձայն՝ ChatGPT-ն նրան ուղղորդել է, թե արդյոք ինքնասպանության իր մեթոդը կաշխատի։

Նշվում է, որ համակարգը նաև առաջարկել է օգնել տղային ինքնասպանությունից առաջ նամակ գրել ծնողներին։