«Արթիկ» ՔԿՀ-ում ազատազրկված անձինք ուժ են կիրառել ծառայողների նկատմամբ. ՔԿԾ
Հոկտեմբերի 24-ին ազատազրկված անձինք խաթարել են «Արթիկ» քրեակատարողական հիմնարկի բնականոն աշխատանքը, ցուցաբերել անհնազանդություն, անհարգալից վերաբերմունք և բացահայտ ագրեսիվ վարքագիծ՝ ֆիզիկական ուժ գործադրելով ծառայողների նկատմամբ. տեղեկացնում է ՀՀ ԱՆ քրեակատարողական ծառայությունը:
Հայտարարության համաձայն՝ ծառայողների կողմից տարված բացատրական և կանխարգելիչ աշխատանքների արդյունքում իրավիճակը կարգավորվել է և գտնվում է ամբողջական վերահսկողության ներքո։
Պատճառը հիմնարկում քրեական ենթամշակույթի, արգելված իրերի դեմ պայքարի, խցերից չթույլատրված առարկաների և սահմանված չափանիշներին չհամապատասխանող կահույքի դուրսբերման աշխատանքներն էին, որոնք ազատազրկված անձանց մոտ առաջացնում էին դժգոհություններ և ուղեկցվում անօրինական պահանջներով:
