Այսօր ամեն ինչից թանկ մեր պետությունն է, և յուրաքանչյուրի կյանքի մասն ու նպատակը պետք է դառնա պետության ու պետականության պաշտպանությունը․ այս մասին ABCmedia-ի հետ զրույցում ասել է Տեր Արամ քահանա Միրզոյան։
«Առաջին հանրապետությունը ձևավորվել է դժդակ պայմաններում, հեշտ չի տրվել նաև Արցախյան ազատամարտը, հաշվի առնելով, որ 1988-ին ավերիչ երկրաշարժ ենք ունեցել, սա է մեր ազգի տոկունության խորհուրդը, ոմանց թվում է` այլևս վերջ, բայց մենք ասում ենք, որ նոր ենք սկսում։
Հայ ժողովուրդը գրեթե 600 տարի պետություն չունենալուց հետո կարողացել է իր հոգում ծրարած պահել պետություն ունենալու այդ իղձը, նույնիսկ ցեղասպանության դաժան օրերից հետո կարողացել հռչակել Առաջին հանրապետությունը, սա բացառիկ տոն է մեզ համար և չափազանց մեծ խորհուրդ և ուժականություն ունի»,- նշել է Տեր Արամ քահանան։
Անդրադառնալով Սրդարապատ հուշահամալիր այցելելուն` քահանան նշել է, որ երեկ արդեն հայտարարվել էր, որ գալու են Սարդարապատ` տոնելու առաջին հանրապետության տոնը և մնալու այստեղ։
«Շատ հայրենակիցներ միացան մեզ և գիշերեցին այստեղ։ Գիշերը բավական խնդրահարույց էր՝ եղանակակի պատճառով, սակայն մեզ դա չխանգարեց, որ մենք ունենանք պայծառ լուսաբաց, շնորհիվ մեր հետաքրքիր, փառահեղ ու հայրենասեր երիտասարդների»,- ասել է նա։
