Ադրբեջանով Հայաստան ներմուծված ցորենն անվտանգ է․ ՍԱՏՄ

Ադրբեջանի տարածքով Հայաստան ներկրված ղազախական ցորենն անցել է անվտանգության փորձաքննությունները և չի պարունակում վտանգավոր, թունավոր կամ ռադիոակտիվ նյութեր․ այս մասին այսօր՝ մամուլի ասուլիսին, ասել է ՍԱՏՄ ղեկավար Տիգրան Պետրոսյանը։

Նրա խոսքով՝ ներմուծվածը պարենային ցորեն է, որ կարելի է ազատ օգտագործել կենցաղում և խոհանոցում։

Պետրոսյանը նշել է, որ նույն որակի ցորեն Հայաստան է ներմուծվում նաև Վրաստանի տարածքով՝ օրական շուրջ 100 բեռնատար։ «Հասկանալի չէ, թե ինչո՞ւ է այսչափ մեծ աղմուկ բարձրացել հենց այս խմբաքանակի շուրջ»,- զարմացել է նա։

Նշենք, որ ղազախական ցորենով բեռնված գնացքը Հայաստան էր հասել նոյեմբերի 6-ին՝ տեղափոխելով մոտ 1000 տոննա բեռ։