Ադրբեջանն ու Պակիստանը սեպտեմբերին ստորագրել են 1,6 միլիարդ դոլարի սպառազինության պայմանագիր՝ Ադրբեջանին մատակարարելու պակիստանա-չինական JF-17 Thunder Block III կործանիչներ՝ ամրապնդելով Իսլամաբադի և Բաքվի միջև ռազմական գործընկերությունը, գրել է The Jamestown Foundation-ը:
Ինչպես նշվել է, վերջին մի քանի տարիների ընթացքում Բաքուն դիվերսիֆիկացնում է իր միջազգային գործընկերությունները, հատկապես Ուկրաինայում Ռուսաստանի պատերազմից հետո: Պակիստանի հետ համագործակցությունն Ադրբեջանի համար հող կստեղծի հարավասիական շուկաներ դուրս գալու համար:
Մինչ Ադրբեջանը միավորվում է Պակիստանի հետ, Հայաստանը խորացնում է ռազմական կապերը Հնդկաստանի հետ՝ պոտենցիալ հարթակ ստեղծելով Հարավային Կովկասում Հնդկաստանի և Պակիստանի միջև մրցակցության համար:
Երկու երկրներն էլ, կարծես, մտել են Հարավային Կովկասում ազդեցության համար մրցավազքի մեջ: Հնդկաստանը ձգտում է համագործակցել Հայաստանի հետ երկկողմ և բազմակողմ ձևաչափով՝ Հարավային Կովկասում ռազմավարական կապի ծրագրեր իրականացնելու համար, ինչպիսին է Թեհրանի հունվարի հայտարարությունը, որ այժմ Հայաստանին թույլ է տալիս օգտագործել իրանական նավահանգիստները Հնդկաստանի հետ երկրի առևտրի համար:
Նմանապես, Հունաստանի արտգործնախարարը մարտին առաջարկել է Հայաստան-Հունաստան-Ֆրանսիա-Հնդկաստան քառակողմ համագործակցության հարթակ: Հնդկաստանից սպառազինության և ռազմական տեխնիկայի գնման բազմաթիվ պայմանագրերը Հայաստանն իրականում դարձրել են Հնդկաստանի ռազմավարական դաշնակիցը տարածաշրջանում։
Պակիստանը Ադրբեջանին դիտարկում է որպես ռազմավարական դաշնակից և ապագա համագործակցությունը կարևոր է համարում Հարավային Կովկասում Հնդկաստանի դիվանագիտական գործունեությանը հակազդելու համար: Անվտանգության լարված իրավիճակը Հարավային Կովկասում ավելի է ամրապնդել Ադրբեջանի, Պակիստանի և Թուրքիայի միջև եռակողմ հարաբերությունները։ Ե՛վ Ադրբեջանի, և՛ Պակիստանի համար այս գործընկերությունը թույլ կտա ամրապնդել իրենց դիրքերը միջազգային հարթակում։
