Ովքե՞ր են անվճար կամ զեղչով երթևեկելու Երևանում, և ինչպե՞ս են վարորդները նրանց տարբերելու

Նոյեմբերի 19-ի ավագանու նիստին քննարկման է դրվելու նոր նախագիծ, ըստ որի` սահմանվելու են արտոնություններ Երևանում տրանսպորտից օգտվողների համար։ Քաղաքապետի մամուլի քարտուղար Հայկ Կոստանյանը ֆեյսբուքյան իր էջում տեղեկացրել է, թե արտոնությունների առաջին փաթեթեում ներառված խմբերը որոնք են։

Այսպիսով, 0-7 տարեկան երեխաները, ծնողազուրկ դպրոցականներն ու ուսանողները, հաշմանդամներն ու պետական խնամքի տակ գտնվող անձինք, հերոսներն ու 4 և ավելի երեխաներ ունեցողները երթևեկելու են անվճար։ Հասարակական տրանսպորտից օգտվելու համար զեղչեր են ունենալու դպրոցականները, ուսանողները, թոշակառուները և նպաստառուները, համապատասխանաբար՝ 20, 15, 30 և 20 տոկոսի չափով։

Լուրն, իհարկե գոհացրեց հանրությանը, սակայն մարդականց մոտ հարցեր առաջացրեց։ Օրինակ ինչպե՞ս պիտի վարորդն իմանա, թե ուղևորը կոնկրետ ո՞ր խմբին է պատկանում։

«Բոլոր այդ տվյալները գտնվում են պետական իքս կառույցների բազաներում, այսինքն բոլոր խմբերի մասին պետական գերատեսչություններում տեղեկություն կա։ Պայմանական, եթե այս կամ այն փաթեթեային խմբի մեջ մտնող անձը, օրինակ ձեռք է բերում ամսական փաթեթը 9000 դրամ արժողությամբ, ապա արդեն ձեռք բերման պահին բազայում երևալու է, որ նա, օրինակ, ուսանող է, և զեղչն ավտոմատ տարիֆի վրա երևալու է։ Այսինքն մարդիկ որևէ մեկին, որևէ բան ցույց տալու կարիք չեն ունենալու»,-ABC media-ի հետ զրույցում ասել է քաղաքապետի մամուլի քարտուղար Հայկ Կոստանյանը։

Այսինքն`անձը, որն օգտվում է որևէ խմբի արտոնությունից, ապա տրանսպորտի փաթեթը ձեռք բերելիս արդեն գնում է զեղչով։

Նախագիծը նոր է, ուստի ամեն բան դեռ հստակեցված չէ. օրինակ` բազմազավակ ո՞ր ծնողներն են անվճար երթևեկելու, որոնց երեխաներն անչափահա՞ս են, թե՞ արտոնությունը տարածվում է նաև չափահաս երեխաներ ունեցող ծնողների համար, հստակ չէ։

Հայկ Կոստանյանի խոսքով՝ շուտով ամեն բան կհաստակեցվի, կհրապարակվի նաև արտոնություններ ունեցող երկրորդ խմբի ցուցակը, որում ներառված կլինեն զինվորականներն ու զոհված տղաների ծնողները։