Եվրախորհրդարանը բանաձև է ներկայացրել վրացի պաշտոնյաների նկատմամբ պատժամիջոցներ կիրառելու վերաբերյալ
Եվրախորհրդարանը բանաձևի վերջնական տարբերակ է ներկայացրել. այս տարբերակի համաձայն՝ Եվրախորհրդարանի պատգամավորները պահանջում են պատժամիջոցներ կիրառել Վրաստանի իշխող «Վրացական երազանք» կուսակցության մի շարք բարձրաստիճան պաշտոնյաների նկատմամբ:
Պաշտոնյաների թվում են իշխող կուսակցության հիմնադիր և պատվավոր նախագահ Բիձինա Իվանիշվիլին, գործող վարչապետ Իրակլի Կոբախիձեն, Թբիլիսիի քաղաքապետ Կախա Կալաձեն, նախկին վարչապետ Իրակլի Ղարիբաշվիլին, խորհրդարանի նախագահ Շալվա Պապուաշվիլին և այլ բարձրաստիճան պաշտոնյաներ։
Եվրախորհրդարանի պատգամավորները նաև պնդում են՝ անձնական պատժամիջոցները պետք է տարածվեն քաղաքական դրդապատճառներով որոշումներ կայացնող դատավորների վրա:
Բացի այդ, բանաձևի վերջնական փաստաթղթում, որը պետք է հաստատվի վաղը՝ նոյեմբերի 28-ին, գրված է, որ ԵՄ-ում Իվանիշվիլիի ակտիվները պետք է սառեցվեն՝ «Վրաստանում քաղաքական գործընթացի վատթարացման գործում նրա դերի և երկրի սահմանադրորեն հռչակված շահերի դեմ գործելու, այդ թվում՝ երկրում Ռուսաստանի ազդեցության գոտին վերականգնելու ջանքերի համար»:
