Ադրբեջանում բանտարկված կրոնական ակտիվիստների թիվը կտրուկ ավելացել է, ոչնչացվել են հայկական կրոնական վայրերը․ Baptist Standard
Ադրբեջանը, որն անցյալ ամիս հյուրընկալել էր ՄԱԿ-ի կլիմայական գագաթնաժողովը, միջազգային հսկողության տակ է հայտնվել մարդու իրավունքների և կրոնական ազատությունների ոտնահարման պատճառով, գրել է Baptist Standard-ը:
Արտաքին դիտորդները բազմիցս մտահոգություն են հայտնել նախկին խորհրդային երկրում կրոնական ազատության վերաբերյալ: Վերջին երկու տարում բանտարկված կրոնական ակտիվիստների թիվը կտրուկ ավելացել է՝ ըստ Ադրբեջանի Խաղաղության և Ժողովրդավարության Ինստիտուտի։
Ինչպես նշվել է, երկիրն ուժեղացրել է իր բանակը և վերջերս իրականացրել այն, ինչ Եվրախորհրդարանն անվանել է «էթնիկ զտում» հայաբնակ Լեռնային Ղարաբաղի տարածքում:
Հայերը, ում ժառանգությունը կապվում է ամենահին քրիստոնյա ազգի հետ, ուշադրություն են հրավիրել Ադրբեջանի կողմից տարածաշրջանում իրենց կրոնական վայրերի ոչնչացման վրա։ Ադրբեջանը հայտնվել է ԱՄՆ-ի 2024 թվականի Կրոնական ազատության միջազգային հանձնաժողովի «առանձնահատուկ մտահոգություն ունեցող երկրների» ցուցակում, որը սահմանվել է այն կառավարությունների համար, որոնք ներգրավված են կամ իրականցնում են կրոնական ազատության «հատկապես դաժան» խախտումները: Ըստ հոդվածի՝ ակտիվիստների մի խումբ կոչ է արել կլիմայի գագաթնաժողովին մասնակցող միջազգային հանրությանը պահանջել ազատ արձակել հայ և այլ քաղբանտարկյալներին, որոնք պահվում են Ադրբեջանի կառավարության կողմից:
Խումբը նաև կոչ է արել պատժամիջոցներ կիրառել, արցախահայերի՝ բնիկ հողեր վերադարձի իրավունք, վերջ տալ մշակութային ժառանգության հակահայկական ոչնչացմանը և քարոզչությանը և ադրբեջանական նավթից օտարմանը:
