Ինչի՞ շուրջ բանավիճեմ քեզ հետ, երբ հայկական Արցախը քո արկածախնդրության պատճառով այլևս գոյություն չունի. Տեր-Պետրոսյանը՝ Փաշինյանին
Հայաստանի առաջին նախագահ Լևոն Տեր-Պետրոսյանն արձագանքել է վարչապետ Նիկոլ Փաշինյանի բանավեճի հրավերին։ Տեր-Պետրոսյանի պատասխանը իր ֆեյսբուքյան էջում հրապարակել է նրա խոսնակ Արման Մուսինյանը։
«Նիկոլ Փաշինյանին
Ինչի՞ շուրջ բանավիճեմ քեզ հետ, երբ բանավեճի առարկան՝ հազարամյակների հայկական Արցախը, քո արկածախնդրության պատճառով այլևս գոյություն չունի, և քեզ այլ բան չի մնում այս դառն իրողությունից մեր ժողովրդի ուշադրությունը շեղելու հուսահատ ճիգերից բացի։
Աղմկիր որքան ուզում ես, այս իրողությունն արդեն պատմական փաստ է, որն այլևս ջնջել չի լինի։
Իսկ եթե, Նիկոլ, ցանկանում ես, որ հանրությունն իմանա ողջ ճշմարտությունը ղարաբաղյան խնդրի կարգավորման դիվանագիտական գործընթացի մասին, ապա առաջարկում եմ. քանի որ Արցախի կործանումից հետո այդ գործընթացի խորհրդապահությունը կորցրել է իր իմաստը, հրապարակել Մինսկի խմբի համանախագահների կողմից պաշտոնապես ներկայացված խաղաղության բոլոր (այդ թվում՝ 2019թ. հունիսի) պլանները և հայկական դիվանագիտության պաշտոնական պատասխանները դրանց։
Այ դա արդեն կլինի իսկական բանավեճ, հիմնված փաստերի վրա։ Իսկ եթե դա չանես, ևս մեկ անգամ կապացուցես, որ փախչում ես ճշմարտությունից և զբաղված ես պատմական պատասխանատվությունից փոքրոգիաբար խուսափելու գործով»։
Նիկոլ Փաշինյանը Հայաստանի նախկին երեք նախագահներին հրավիրել էր բանավեճի՝ Արցախի թեմայով։ Նա հայտարարել էր, թե «1994-ից հետո կարգավորման բոլոր բանակցությունները եղել են ԼՂ-ն Ադրբեջանի կազմ վերադարձնելու մասին»։ Հայաստանի երեք նախագահներն էլ մերժել են բանավեճի հրավերը։
