Լեհաստանն ազդարարել է, որ ցանկանում է խոչընդոտներ սահմանել ԵՄ ռուսական գազի ներմուծման համար
Գրեթե երեք տարի անց այն պահից, ինչ ռուսական հրթիռները սկսել են տեղալ Ուկրաինայի վրա, Եվրոպան դեռևս մեծ քանակությամբ նավթ և գազ է գնում Մոսկվայից: Այժմ Լեհաստանը ցանկանում է սեղմել այդ եկամուտները, գրել է Politico-ն։
Վարշավան՝ Կիևի ամենամոտ դաշնակիցներից մեկը, հուսով է օգտագործել Եվրամիության քաղաքականության օրակարգը ղեկավարելու իր հերթը՝ լույս սփռելու այն բանի վրա, թե որքան վառելիք է դաշինքը դեռ ներմուծում ՌԴ-ից և նոր արշավ սկսելու հեղուկ բնական գազի (LNG) և միջուկային ներկրումների դեմ։
Աջ կենտրոնամետ Քաղաքացիական կոալիցիայի կառավարությունը՝ վարչապետ Դոնալդ Տուսկի գլխավորությամբ, հունվարի 1-ից կստանձնի ԵՄ Խորհրդի վեցամսյա նախագահությունը: Այն դեպքում, երբ այլ խոշոր տնտեսություններ, ինչպիսիք են Ֆրանսիան և Գերմանիան, կանգնած են քաղաքական քաոսի առաջ, ուկրաինացիները և դաշինքում նրանց ամենամոտ դաշնակիցները նայում են դեպի Վարշավա՝ իր վրա պատասխանատվությունը վերցնելու համար:
Ըստ Հելսինկիի էներգետիկայի և մաքուր օդի հետազոտությունների կենտրոնի՝ ԵՄ-ն, ընդհանուր առմամբ, ավելի քան 200 միլիարդ եվրո է ծախսել ռուսական նավթի և գազի վրա Մոսկվայի լայնածավալ ներխուժման սկզբից ի վեր: Միևնույն ժամանակ, չնայած բլոկի ողջ սահմանափակումներին, ինչպիսիք են ծովային հումքի ներմուծման էմբարգոն, դեռևս կան մեծ բացեր, և որոշ վառելիքի գնումներն աճում են: Բացի այդ՝ կան նախազգուշացումներ, որ Ռուսաստանը բացահայտորեն խախտում է Արևմուտքի կողմից սահմանված գնային շեմը, որը սահմանափակում է այն գումարը, որը նա կարող է գանձել իր նավթի համար:
Տուսկը նախկինում կոչ է արել «առավել լայն պատժամիջոցներ» կիրառել Մոսկվայի դեմ և Խորհրդում Լեհաստանի նախագահությանն ընդառաջ ազդարարել է, որ ցանկանում է խոչընդոտներ սահմանել ԵՄ ռուսական գազի ներմուծման համար, ինչպես նաև թիրախավորել միջուկային տեխնոլոգիաները և վառելիքի մատակարարման շղթան, որը շարունակում է եկամուտներ բերել Կրեմլին:
Լեհաստանի նախագահությունը համընկնում է նոր Եվրահանձնաժողովի հետ, և պաշտոնյաները ցանկանում են ցույց տալ, որ կարող են ավելին անել: Դան Յորգենսենը՝ Դանիայի կլիմայի նախկին նախարարը, ով այժմ ղեկավարում է դաշինքի էներգետիկ քաղաքականությունը, խոստացել է 2025 թվականի առաջին եռամսյակում ներկայացնել «ճանապարհային քարտեզ»՝ աստիճանաբար վերացնելու Ռուսաստանից կախվածությունը:
Ռուսական վառելիքի վերաարտահանման ԵՄ նոր սահմանափակումները, որոնք ընդունվել էին նախորդ պատժամիջոցների փաթեթով, նույնպես ուժի մեջ կմտնեն հաջորդ տարվա առաջին ամիսներին։ Դա նշանակում է, որ ԵՄ երկրները պարտավոր կլինեն արգելափակել բնական գազի վերավաճառքը, որը հոսում է իրենց նավահանգիստներով՝ լոգիստիկ գլխացավանք ստեղծելով Մոսկվայի տանկերների նավատորմի համար։ Բելգիան և Ֆրանսիան այս առևտրի հիմնական կենտրոններից երկուսն են և արդեն հայտարարել են նոր կանոնները կիրառելու իրենց մտադրության մասին:
Politico-ի հետ զրույցում Բելգիայի էներգետիկայի նախարար Թին Վան դեր Ստրեյտենը նշել է, որ դաշինքը «թափանցիկության» վրա կենտրոնանալու կարիք ունի, այսինքն՝ հասկանալու վառելիքի իրական ծագումը, և որ երկիրը Լեհաստանի նախագահության ժամանակ քննարկման է ներկայացրել հենց հարցը:
Հնարավոր լուծումը կլինի «Ռոսատոմ»-ի հետ նոր համատեղ նախագծերի արգելափակումը, ինչը կստիպի երկարաժամկետ հեռանալ Ռուսաստանի միջուկային արդյունաբերությունից: Այս ամսվա սկզբին երկու դիվանագետներ, ովքեր տեղյակ էին Լեհաստանի նախագահությունից առաջ անցկացվող կուլիսային բանակցությունների մասին, POLITICO-ին հայտնել են, որ փոխզիջումը դիտվում էր որպես օղակը սեղմելու միջոց՝ առանց Հունգարիայի վետոյի բախվելու:
«Ռուսաստանը միավորում է ջանքերը՝ դառնալու միջուկային հատվածի անփոխարինելի մասը, ինչպես նախկինում արեցին նավթի և գազի հետ կապված», – նշել է բանագնացներից մեկը: Այնուամենայնիվ, նույնիսկ այդ թույլ սահմանափակումները կարող են բախվել Հունգարիայի հակազդեցությանը:
