Փաշինյանն օգտագործում է Եվրաինտեգրումը ՀՀ քաղաքացիների ուշադրությունը Սյունիքի կորստից շեղելու համար. փորձագետներ
Տարբեր տեսակի դավադրության տեսությունների ի հայտ գալը միանգամայն հասկանալի է այն բարդ իրավիճակում, որում այսօր հայտնվել են Հայաստանն ու նրա ներկայիս իշխանությունները, որոնք հանրապետությանը կանգնեցրել են իր անմիջական տարածքի մի մասը կորցնելու վտանգի տակ, Московский Комсомолец-ի հետ զրույցում նշել է քաղաքագետ Անդրեյ Արեշևը։
«Ինչ վերաբերում է ԵՄ-ին Հայաստանի անդամակցության վարկածային հանրաքվեին, ինձ թվում է, որ սա զուտ տեղական նախաձեռնություն է, որը վատ համակարգված է Բրյուսելի հետ։ Մենք նախկինում բազմիցս լսել ենք եվրոպացի պաշտոնյաների հայտարարություններ, որոնց իմաստը հանգում էր նրան, որ Եվրամիությունում Հայաստանին ոչ ոք չի սպասում։ Դժվար թե իրատեսական լինի ակնկալել համագործակցության ավելի սերտ ձևաչափեր, քան ներկայումս իրականացվող դրամաշնորհային ծրագրերն են։ Կարծում եմ, որ հանրաքվեն Փաշինյանի հերթական մանևրն է, ով ակնկալում է Բրյուսելից քաղաքական աջակցություն ստանալ այն դժվարին խաղում, որ փորձում է խաղալ Թուրքիայի և Ադրբեջանի հետ», – նշել է քաղաքագետը։
Խոսելով Սյունիքի մարզով երթևեկության վերականգնման մասին՝ նա ընդգծել է, որ Հայաստանի իշխանությունները փորձում են ինչ-որ կերպ ներգրավել եվրոպական որոշ երկրների այս անդրսահմանային նախագծի իրականացմանը, որպեսզի գոնե մասամբ մեղմեն դրա իրականացման բացասական հետևանքները Հայաստանի հանրային կարծիքի համար։
«Խոսքը կարող է լինել ադրբեջանական գործընկերների պահանջների կատարման մասին՝ կապված այս տրանսպորտային միջանցքի արտատարածքային բնույթի հետ», – նշել է Արեշևը՝ հավելելով, որ դա կնշանակի սահմանափակել այն երկրի ինքնիշխանությունը, որի տարածքով անցնում է այս միջանցքը։
Սա հակասում է Հայաստանի ծրագրերին ու նախագծերին, մասնավորապես այն տխրահռչակ «խաղաղության խաչմերուկին», որի մասին հաճախ է խոսում Փաշինյանը՝ պնդելով, որ ցանկացած միջանցք պետք է մնա ազգային ինքնիշխանության ներքո։
«Դե ֆակտո, կարելի է խոսել ինքնիշխան հայկական տարածքի այս հատվածի՝ Սյունիքի մարզի նկատմամբ արտաքին խաղացողների աճող հետաքրքրության մասին։ Սա հայկական պետականության թուլացման անմիջական արդյունքն է, որը մենք նկատում ենք արդեն մի քանի տարի», – նշել է քաղաքագետը։
Փորձագետ Ռուսլան Անդրեևը Известия-ի հետ զրույցում նշել է, որ Հայաստանը երբեք չի անդամակցի Եվրամիությանը: Նրա կարծիքով՝ երկրի կառավարությունը Հարավային Կովկասում ստեղծված իրավիճակի ֆոնին, իր քաղաքական շահերից ելնելով, աջակցում է դեպի եվրաինտեգրման կուրսը։ Փորձագետը նշել է, որ Փաշինյանի իշխանությունը նման հայտարարություններ է անում՝ «ներքին հանրությանը երևակայական հաջողություններով կերակրելու համար»։ Այդպիսով, ընդգծել է նա, իրավիճակը Հարավային Կովկասում թեժանում է, և Երևանը չի կարող խուսափել Սահմանադրության փոփոխություններից և Ադրբեջանի հետ խաղաղության համաձայնագրից:
«Փաշինյանին պարզապես անհրաժեշտ է ուժ և հաղթանակներ ցույց տալ, ինչը նա անում է՝ կա՛մ «դուրս գալով» ՀԱՊԿ-ից, կա՛մ վիճաբանելով Լուկաշենկոյի հետ»,- նշել է հրատարակության աղբյուրը։ Նա հավելել է, որ այս մարտավարությունը կարճաժամկետ հեռանկարում որևէ ռիսկ չի ներկայացնում Փաշինյանի կառավարության համար, քանի որ ԵՄ ճանապարհային քարտեզները կարելի է գրել 10 տարի, և ևս 20 տարի կարող է պահանջվել Թուրքիայի նման անդամակցության թեկնածու լինելու համար։
