Իրանի համար կարևոր են Հարավային Կովկասի անվտանգությունը և «3+3» ձևաչափը․ Իրանի ԱԳՆ
Իրանի ԱԳՆ պաշտոնական ներկայացուցիչ Իսմայիլ Բաղային ասուլիսում հայտարարել է, որ Իրանի Ազգային անվտանգության գերագույն խորհրդի քարտուղար Ալի Աքբար Ահմադիանի՝ անցյալ շաբաթ Ադրբեջան և Հայաստան կատարած այցերը նախապես էին ծրագրված։
«Իրանը կարևոր է համարում և՛ Ադրբեջանի, և՛ Հայաստանի հետ հարաբերությունները։ Հարավային Կովկասի անվտանգությունը մեզ համար կարևոր է, և մենք կօգտագործենք բոլոր հնարավորությունները դրանք ամրապնդելու համար այս կարևոր տարածաշրջանում։ Անվտանգությունը պետք է ապահովեն տարածաշրջանի երկրները, որոնք հեռու են արտաքին միջամտությունից»,- ընդգծել է Բաղային։
Նրա խոսքով՝ այս այցը նպատակ ուներ ամրապնդել հարաբերություններն ու քննարկումները այս երկու երկրների հետ՝ վստահ լինելու, որ տարածաշրջանում խաղաղության պահպանմանն ու ամրապնդմանն ուղղված նախկին գործընթացները, այդ թվում՝ «3+3» ձևաչափը, կշարունակվեն։ ԱԳՆ ներկայացուցիչն ընդգծել է, որ Իրանը պատրաստ է աջակցել այս գործընթացին այս ուղղությամբ ունեցած բոլոր հնարավորություններով։
