ԵԱՏՄ-ում տնտեսական աճը 2024–ի արդյունքներով կկազմի 4%

ԵԱՏՄ երկրների համախառն ՀՆԱ-ն 2024 թվականին, ըստ նախնական տվյալների, աճել է մոտ 4 տոկոսով։ Ինչպես հաղորդում է Ղազախստանի կառավարության մամուլի ծառայությունը, այսպիսի տվյալներ են ներկայացվել Ալմաթիում կայացած Եվրասիական միջկառավարական խորհրդի նեղ ձևաչափով նիստի ժամանակ: Հայաստանից նիստին մասնակցել է փոխվարչապետ Մհեր Գրիգորյանը:

2024 թվականի արդյունքներով միության տնտեսության գործունեության առանցքային ցուցանիշը կկազմի մոտ 4 տոկոս։ Ընդգծվել է համատեղ ջանքերի անհրաժեշտությունը, որպեսզի մինչև 2030 թվականը մոտենան ԵԱՏՄ շրջանակում տնտեսական գործընթացների հետագա զարգացման մասին հռչակագրում նշված նպատակներին։

ԵԱՏՄ կառավարությունների ղեկավարները քննարկել են նաև ագրոարդյունաբերական ոլորտում իրականացվող համատեղ նախագծերի իրականացումը և դրանց աջակցելու մեխանիզմները: Հատուկ ուշադրություն է դարձվել տեխնոլոգիական ուղղություններին՝ սելեկցիայի, սերմնաբուծության զարգացմանը, ինչպես նաև գյուղմթերքի արտադրությանն ու վերամշակմանը, ենթակառուցվածքների ընդլայնմանը:

Քննարկվել է ԵԱՏՄ ինտեգրված տեղեկատվական համակարգի ակտիվացման անհրաժեշտությունը։

Նշենք, որ ըստ վերջին պաշտոնական տվյալների՝ 2024 թվականի հունվար-սեպտեմբերին ԵԱՏՄ-ի ՀՆԱ-ն աճել է 4,2 տոկոսով, ընդ որում`Հայաստանում՝ 6 տոկոսով, Բելառուսում՝ 4,5 տոկոսով, Ղազախստանում՝ 4,1 տոկոսով, Ղրղզստանում՝ 8,4 տոկոսով, Ռուսաստանում՝ 4,2 տոկոսով։