Հայաստանը և Ադրբեջանը սահմանին հանդիպում են անցկացրել անհետ կորածների հարցով․ ԱԱԾ
Հայաստան ու Ադրբեջանը սահմանին հանդիպում են անցկացրել անհետ կորածների հարցով, հայտնում են ադրբեջանական լրատվամիջոցները։ Հանդիպման լուրը հաստատել է ՀՀ Ազգային անվտանգության ծառայությունը։
Ըստ գերատեսչության՝ տեղի է ունեցել Հայաստանի Հանրապետության գերիների, պատանդների և անհայտ կորած (գտնվելու վայրն անհայտ) անձանց հարցերով զբաղվող միջգերատեսչական հանձնաժողովի և Ադրբեջանի Հանրապետության ռազմագերիների, պատանդների և անհայտ կորած քաղաքացիների հարցերով պետական հանձնաժողովի հանդիպումը:
«Հանդիպման ընթացքում կողմերը կարծիքներ են փոխանակել անհայտ կորած անձանց ճակատագրի պարզաբանման հարցերի վերաբերյալ և համաձայնության եկել, որ հանձնաժողովների միջև փոխադարձ համաձայնությամբ քննարկումները կշարունակվեն»,-ասվում է ԱԱԾ-ի հաղորդագրության մեջ:
